Pakul bolšaść ajčynnych praduseraŭ praciahvajuć lapić prajekty-kłony rasiejskaj estrady, viadomyja muzyki ŭ susiednich krajach vučać biełaruskuju movu. Piša Siarhiej Budkin.
Siońnia pieśnia pa-biełarusku siarod muzykaŭ u susiednich krajoch ličycca ŭdałaj pijar-akcyjaj dy lepšym sposabam prademanstravać salidarnaść ź biełarusami.
Dyktataru pryviet iz Polščy
Polski hurt Big Cyc maje 18-hadovuju historyju, a ŭ jaho dyskahrafii 13 albomaŭ.
Napačatku ŭ svaich pieśniach muzyki kpili z kamunistaŭ. Ich pieršaja kružełka mieła nazvu «Z partyjnym pryvietam!», a na vokładcy była źmieščana vyjava Lenina z pankaŭskim irakiezam. Tady svoj styl jany žartoŭna vyznačali jak «lambada-hard-kor». Zrabiŭ furor u Zachodniaj Eŭropie i druhi ich dysk «Zachodni Berlin», jaki byŭ zapisany pad uražańniem ad pieršych vystupaŭ u abjadnanaj Niamieččynie.
Maładyja panki ź ciaham času pastaleli, lider hurtu Kšyštaf Skiba staŭ viadučym kalumnistam u tydnioviku Wprost, ich muzyka palahčeła, a temy tvoraŭ nabyli vyraznaje sacyjalnaje adcieńnie.
Big Cyc — adzin z samych palityčna aktyŭnych hurtoŭ Polščy. Jany adrazu adhuknulisia na prapanovu ŭziać udzieł u akcyi salidarnaści ź Biełaruśsiu ŭ Varšavie razam z Neuro Dubel. Na hetym kancercie 16 lutaha Big Cyc prezentavali pieśniu «Dyktatar», dzie kpiać ź biełaruskaha prezydenta, jaki «bardzo lubi sport» i «nie lubi czytac gazet», dy staviać jaho ŭ adzin šerah z Stalinym, Brežnievym dy Pinačetam.
Na novy, 14-ty, albom, jaki maje vyjści dniami, hurt zapisaŭ «Dyktatara» pa-biełarusku — upieršyniu ŭ svajoj bahataj historyi. K.Skiba ŭ adnym ź interviju pryznaŭsia, što ŭsiaho za niekalki dzion paśpiachova prajšoŭ intensiŭny kurs biełaruskaj movy. Ciapier «Dyktatar» hučyć pa-biełarusku na ŭsich kancertach hurtu. Pieśnia dastupnaja dla zhružeńnia na aficyjnym sajcie kamandy bigcyc.pl.
Big Cyc tak upadabali svaju biełaruskamoŭnuju pieśniu «Dyktatar», što śpiavajuć jaje na ŭsich kancertach.
Butch śpieli na «ekzatyčnaj» movie
Rasiejski prajekt Butch — hedłajner rasiejskich «piŭnych» festyvalaŭ — taksama zapisaŭ pieśniu na biełaruskaj movie. U hurcie nichto nia maje biełaruskich karanioŭ, i muzyki dalokija ad apiavańnia sacyjalna-palityčnych temaŭ. Salistka Alena Pahrebiskaja pryjšła ŭ muzyku z žurnalistyki — jana pracavała palityčnym kamentataram prahramy «Vriemia» na ORT.
Butch składajecca z byłych udzielnikaŭ niekali papularnaha ŭ Rasiei hurtu «Maša i miedviedi». Niekali Alena ŭžo ździviła svaich prychilnikaŭ, kali paśla pop-rokavaha albomu zrabiła albom ramansaŭ.
Niadaŭna Butch prezentavali svaju novuju pieśniu «Nie dali». Jak dziela ekzotyki, tak i ŭ jakaści praduserskaha chodu. Pazaletaś Butch vystupili razam z hurtom «Indyha» ŭ Miensku: narodu sabrałosia mieniej, čym chacieli maskvičy, i tamu, kab zavabić biełaruskuju aŭdytoryju, jany paabiacali viarnucca ŭ Miensk ź biełaruskamoŭnaj pieśniaj. Viałasia razmova nakont taho, kab biełaruski varyjant ich novaj pieśni zrabiŭ Andrej Chadanovič, ale rasiejcy vyrašyli davierycca svajoj maskoŭskaj znajomcy, jakaja niekali pracavała ŭ prahramie BT «5 na 5». Pierakład vyjšaŭ niedaskanały («U lubvi dźvie starany adnoj medali», — piajuć Butch), ale svajo abiacańnie Butch vykanali. «Nie dali» maje vyjści na synhle kamandy.
Vakalistka «Butch» časam pazycyjanuje siabie jak vakalist.
Kazacki rok pa-biełarusku
Kijeŭskaja kamanda «Tiń Soncia» isnuje z 1999 h. i maje ŭ dyskahrafii dva albomy; hetaksama hurt atrymaŭ hran-pry ŭkrainskaha festyvalu «Podych». Spačatku chłopcy hrali ŭ rečyščy alternatyŭnaha roku, ale potym pierajšli da vykanańnia «kazackaha roku» ci to folk-metału. Ad hetaha času hurt supracoŭničaje z takimi ŭkrainskimi palityčnymi arhanizacyjami, jak «Sojuz hieťmanciv-dieržavnikiv» i «Prośvita», a taksama zapačatkavaŭ prajekt «Patriotična Rok-Tribuna», jaki stavić na mecie pramocyju prahresiŭnych i patryjatyčnych kamandaŭ.
Lider «Tiń Soncia» Siarhiej Vasiluk ličyć, što biełaruskaja mova nia moža być čužoj dla ŭkraincaŭ, bo jana jość «adnoj z movaŭ našaj supolnaj prabaćkaŭščyny — Rusi».
Ukraincy zrabili «Pieśniu Čuhajstra» — svaju versiju anhielskamoŭnaj Twilight Sun dla trybjutu Gods Tower, a potym pieraśpiavali hetuju ž pieśniu pa-biełarusku, pryśviaciŭšy tvor 20-j hadavinie Čarnobylskaj avaryi. Lider Gods Tower Nožyk niejak pryznaŭsia, što kaver vyjšaŭ lepšy za aryhinał.
Kiraŭnik «BMA Group» Vital Supranovič pavodle vynikaŭ 2005 hodu navat ułučyŭ hetuju pieśniu ŭ trojku najlepšych biełaruskich hitoŭ. Ukrainskija muzyki rychtujuć taksama biełaruskamoŭnuju staronku na svaim aficyjnym sajcie sun-shadow.info. Biełaruskaja versija «Pieśni Čuhajstra» ŭdzielničaje zaraz u hit-paradzie «Tuzin Hitoŭ».
Pośpiech «Pieśni Čuhajstra» natchniŭ Siarhieja Vasiluka biełarusizavać internet-staronku svajho hurtu.
U padtrymku demakratyi
De Shifer nazyvajuć «reanimatarami ŭkrainskaha hard-koru». Jany źjavilisia 10 hod tamu pad rasiejskaj nazvaj «Vspychnuł šifier», ale praz hod źmianili svoj repertuar na ŭkrainskamoŭny.
Svaje apošnija dva dyski hurt zapisaŭ u Londanie i Berlinie. Šalonuju papularnaść kamanda nabyła padčas ukrainskich vybaraŭ-2005, dziakujučy pieśni «Čas prijšov». De Shifer navat atrymali pamiatny znak «Aktyŭnyja ŭdzielniki Pamarančavaj revalucyi». Lider hurtu Źmicier Bohuš vyrašyŭ zapisać svoj hit jašče na dziesiaci movach dy vydać internacyjanalny samotnik. Najpierš De Shifer zanialisia biełaruskamoŭnaj versijaj. 26 sakavika muzyki prezentavali «Čas pryjšoŭ» u pres-centry bloku «Naša Ŭkraina». «Hety tvor — naturalnaje žadańnie padtrymać našych bratoŭ-biełarusaŭ u ich zmahańni za demakratyju», — tłumačyć Z.Bohuš. Biełaruskaja versija ŭkrainskaha hita ŭvojdzie ŭ novy samotnik kamandy Freedom song.
Navat u Pietrazavodzku
Biełaruskaja tematyka cikavić jak vykanaŭcaŭ staražytnaj muzyki, tak i sučasnych muzyčnych eksperymentataraŭ. Hurt Drolls ź Pietrazavodzku, jaki nieadnojčy pryjaždžaŭ u Biełaruś z kancertami, zapisaŭ ź biełaruskimi muzykami z «Hudy» prajekt Zara.
Pavodle słovaŭ Viktoryi Michno z «Hudy», Drolls vyjaviŭ bieražlivaje staŭleńnie da prapanavanaha archaičnaha piesiennaha materyjału dy vysokaje ŭłasnaje vykanalnickaje majsterstva.
Udzielniki Drolls — vypuskniki Pietrazavodzkaj kanservatoryi — u svaju čarhu pryznajucca, što prajekt Zara — cikavaja sproba spałučeńnia siaredniaviečnaj eŭrapiejskaj muzyki i słavianskaj jazyčnickaj kultury: «My namahalisia nie supraćpastaŭlać hetyja płasty, a vyjavić ich uzajemapraniknieńnie», — kažuć muzyki. U zapisie biełaruska-rasiejskaha prajektu taksama ŭziaŭ udzieł adzin z najlepšych folk-vykanaŭcaŭ Rasiei Alaksandar Lavonaŭ.
Pietrazavodzkija menestreli z Drolls stvaryli z «Hudaj» cełuju prahramu.
Muzyčnych eksperymentataraŭ z maskoŭskaha hurtu «NOM» taksama pryvabiła biełaruskaja tematyka. Ale jany vyrašyli ŭvasobić svaju ideju nie ŭ muzyčnym dysku, a ŭ kinafilmie. Na pačatku krasavika ŭ Maskvie adbyłasia prezentacyja filmu «Biełaruskaja byl», źniataha ŭdzielnikami hurtu Andrejem Kahadziejevym i Mikałajem Kapiejkinym, a hałoŭnuju rolu ŭ im vykanaŭ eks-lider «NOM» Siarhiej Kahadziejeŭ. Ale film — heta ŭžo inšaja historyja. Interviju ź jaho stvaralnikami čytajcie ŭ bližejšych numaroch «NN».
Rasiejski hurt «NOM» źniaŭ film «Biełaruskaja byl».
