21 sakavika 2016 hoda subjekty haspadarańnia Biełarusi atrymajuć mahčymaść kuplać i pradavać valutu na biržavym rynku. Heta praduhledžana pastanovaj praŭleńnia Nacyjanalnaha banka № 106.
«Rašeńnie pryniataje z metaj dalejšaha ŭdaskanaleńnia miechanizmaŭ funkcyjanavańnia ŭnutranaha valutnaha rynku», — rastłumačyŭ Nacbank u pres-relizie nieabchodnaść pryniaćcia dakumienta.
Zhodna z pastanovaj, subjekty haspadarańnia zmohuć ažyćciaŭlać ad svajho imia na biržavym rynku kuplu, prodaž zamiežnaj valuty pry pasiarednictvie bankaŭ.
Jak patłumačyli BiełaPAN ŭdzielniki finansavaha rynku, da ciapierašniaha času pradpryjemstvy mahli kuplać (pradavać) valutu tolki na pazabiržavym rynku (u bankaŭ). «Zaraz banki buduć vystaŭlać zajaŭki klijentaŭ na biržy padčas tarhoŭ. Dziakujučy pryniataj pastanovie subjekty haspadarańnia atrymajuć jurydyčnuju mahčymaść udzielničać u biržavych tarhach pry pasiarednictvie bankaŭ», — adznačyŭ surazmoŭca BiełaPAN.
Pavodle adnoj ź viersij, jakuju vykazvajuć ŭdzielniki rynku, pradpryjemstvam dadzieny dostup da biržavych tarhoŭ dla minimizacyi vydatkaŭ, źviazanych z valutna-abmiennymi apieracyjami na pazabiržavym rynku.
Nahadajem, Nacbank 1 červienia 2015 hod źmianiŭ režymu tarhoŭ — zamiest fiksinhu valutna-abmiennyja apieracyi stali pravodzicca ŭ režymie bieśpierapynnaha dvajnoha aŭkcyjonu. U paraŭnańni z režymam fiksinhu, pry jakim usie ździełki pa adnoj zamiežnaj valucie ažyćciaŭlalisia pavodle adnaho i taho ž kursu, padčas tarhoŭ u režymie bieśpierapynnaha dvajnoha aŭkcyjonu kursy zaklučanych ździełak mohuć adroźnivacca.
