Kasir fatahrafavaŭ na ajfon kartki pakupnikoŭ i marnavaŭ ich hrošy na kitajskich sajtach
Biełaruskija śledčyja zaraz zajmajucca ŭ peŭnym sensie ŭnikalnaj spravaj, źviazanaj z kradziažom hrošaj z kart-rachunkaŭ uładalnikaŭ bankaŭskaha «płastyka». I kali naviny pra skimiery (tak nazyvajucca pryłady, jakija ŭstaloŭvajuć na bankamaty, kab «padhledzieć» PIN-kod) užo nikoha nie ździŭlajuć, to tut havorka idzie pra vypadak z razradu «usio hienijalnaje — prosta». U kradziažy abvinavačvajuć byłoha kasira adnoj z kram, jaki prymudraŭsia nie tolki absłuhoŭvać pakupnikoŭ, ale i kraści rekvizity ich bankaŭskich kartak.
«U jakaści abvinavačanaha pa spravie prachodzić minski student, jaki hod tamu ŭładkavaŭsia padpracavać na dva miesiacy ŭ adzin ź sietkavych staličnych hipiermarkietaŭ», — dzielicca z FINANCE.TUT.BY padrabiaznaściami namieśnik načalnika adździeła pa rasśledavańni złačynstvaŭ suprać infarmacyjnaj biaśpieki i niezakonnaha abarotu narkotykaŭ śledčaha ŭpraŭleńnia USK pa Minsku Dźmitryj Astrejka.
20-hadovy chłopiec vyrašyŭ padpracavać kantraloram-kasiram. Śledstvu jašče treba vyśvietlić, ci było pracaŭładkavańnie častkaj płana abo schiema machlarstva pryjšła studentu ŭ hałavu ŭ toj momant, kali jon raźličvaŭ čarhovaha pakupnika. U jakoj mienavita kramie pracavaŭ padazravany, nie raskryvajecca. Viadoma tolki, što havorka idzie pra Zavodski rajon stalicy.
Małady kasir «uzbroiŭsia» ajfonam i fatahrafavaŭ na jaho vierchni bok kartak pakupnikoŭ. «Vybiraŭ, jak praviła, zamožnych klijentaŭ sa statusnymi kartkami», — udakładniajuć u Śledčym kamitecie. Łohika zrazumiełaja: z adnaho boku, na rachunku ŭ piensijaniera ci studenta redka lažać svabodnyja miljony, z druhoha — jość nadzieja, što klijent z kartkaj typu «Gold» moža i nie zaŭvažyć, što ź jaho rachunku źniknie niejkaja suma.
Zdymki chłopiec rabiŭ u toj momant, kali prachodziła apieracyja pa apłacie pakupak. Adzin ruch ruki — i ŭ kasira akazvaŭsia numar «płastyka», imia i proźvišča ŭładalnika i termin dziejańnia kartki. Źniać hrošy ŭ bankamacie hety nabor dadzienych nie dapamoža, a voś raspłacicca ŭ internecie — zaŭsiody kali łaska. Dadamo da hetaha jašče i toje, što sprytny kasir prymudraŭsia asobna zapisvać CVV-kod (kambinacyja z troch ličbaŭ na advarotnym baku kartki, taksama patrebna dla raźlikaŭ u internecie).
Pieršy čas student prosta fatahrafavaŭ kartki, tak by mović, źbiraŭ bazu dadzienych, ale rekvizity ŭ chod nie puskaŭ. Jak kažuć śledčyja, pieršyja niezakonnyja apieracyi jon ździejśniŭ, kali termin jaho pracy ŭžo padychodziŭ da kanca.
«Vykradzienyja dadzienyja z kartak vykarystoŭvalisia dla apłaty tavaraŭ na sajcie aliexpress.com. Častka hetych tavaraŭ (naprykład, novy ajfon) paśpieła pryjści na jaho adras, — raspaviadaje Źmicier Astrejka. — Akramia taho, abvinavačvany apłačvaŭ ź ich dapamohaj taksama hulniavyja servisy, anłajn-hulni, unosiŭ hrošy na bałans svajho rachunku na resursie Pokerstars».
Słovam, zvyčajnyja studenckija patreby, na jakija jon raniej marnavaŭ ułasnyja hrošy.
Śledčyja kažuć, što ŭ «kartačnych spravach» pra złačyncaŭ daviedvajucca ŭžo paśla taho, jak hramadzianie zaŭvažajuć, što ź ich rachunku źnikajuć hrošy, i źviartajucca ŭ pravaachoŭnyja orhany. Ale situacyja z 20-hadovym kasiram inšaja: niekatoryja paciarpiełyja doŭhi čas navat i nie zdahadvalisia, što paśla pachodu pa pradukty stali jašče i «pakupnikami» na kitajskich sajtach.
«U niekatorych uładalnikaŭ kartak nie była padklučana pasłuha SMS-apaviaščeńnia, — tłumačyć pradstaŭnik SK. — Naprykład, adna z paciarpiełych 4 miesiacy nie zdahadvałasia, što ź jaje kartki «sychodziać» niekatoryja sumy hrošaj». Akazalisia ŭ fotaalbomie złačyncy nie tolki zarpłatnyja kartki, ale i «kredytki». Čałaviek ŭnosiŭ hrošy na rachunak, a častka ź ich sychodziła na patreby kasira.
Jak mienavita vyjšli na pradprymalnaha chłopca, śledčyja da suda nie raspaviadajuć. Viadoma tolki toje, što biełarusy ŭ hetaj spravie pryciahvali na dapamohu svaich kalehaŭ z Nacyjanalnaha kantaktnaha punkta Vialikabrytanii i Irłandyi. «My praanalizavali šerah kryminalnych spraŭ, supastavili najaŭnuju infarmacyju i vyjšli na hetaha čałavieka», — kaža Źmicier Astrejka.
Śledčyja pryznajuć: časam kartačnyja machlary iduć na padobnyja złačynstvy tamu, što vierać u svaju biespakaranaść. Maŭlaŭ, servisy, na jakich jany płaciać čužym «płastykam», — zamiežnyja, zarehistravacca tam možna pad psieŭdanimam, a ŭzajemadziejańnie ź inšymi krainami ŭ našych pravaachoŭnikaŭ nie naładžana.
Ale na praktycy ŭsie hetyja, zdavałasia b, virtualnyja złačynstva pieratvarajucca ŭ realnyja pakarańni. Były kasir ciapier źniavoleny, jamu pradjaŭlenaje abvinavačvańnie pa č.3 artykuła 212 Kryminalnaha kodeksa (Kradziež šlacham vykarystańnia kampjutarnaj techniki). Kali vina studenta budzie dakazanaja, jamu pahražaje ad dvuch da siami hadoŭ sa štrafam abo biez štrafu z kanfiskacyjaj majomaści abo biez kanfiskacyi.
Akramia taho, u SK padkreślivajuć, što maštab kradziažu pakul da kanca nie padličany, nie ŭsie paciarpiełyja pa spravie vyznačanyja. «Mnostva apieracyj budzie pastaŭlena ŭ vinu jak zamach, — dadaje Źmicier Astrejka. — Heta značyć, što abvinavačany sprabavaŭ ździejśnić apieracyju, ale zrabić heta jamu nie ŭdałosia: naprykład, na kartcy ŭ hety momant nie było hrošaj abo bank admoviŭ u apieracyi z-za ŭstalavanaha limitu».
Parady ekśpiertaŭ: jak abaranić hrošy na kartcy
- padklučycie pasłuhu SMS-apaviaščeńnia, tak vy adrazu daviedajeciesia pra toje, što z vašaj kartki zdymajuć (sprabujuć źniać) hrošy, i zmožacie apieratyŭna jaje zabłakavać;
- dla raźlikaŭ u internecie, a taksama pajezdak za miažu zaviadzicie asobnyja kartki, na jakich nie budzie zachoŭvacca ŭsia vaša zarpłata;
- nie pieradavajcie dadzienyja svajoj kartki starońnim ludziam, navat svaim svajakam i siabram;
- nie zachoŭvajcie paroli dostupu da internet-bankinhu na kampjutary;
- raźličvajučysia kartkaj ŭ kramie (kaviarni i hetak dalej), sačycie, kab vaš «płastyk» zaŭsiody byŭ u poli zroku, nie dazvalajcie kasiram vynosić jaho;
- pry ździajśnieńni płaciažoŭ u internecie starajciesia vybirać pravieranyja sajty z abaronienym kanałam suviazi. U bolšaści papularnych braŭzieraŭ vizualna heta paznačajecca vyjavaj zamočka kala adrasnaha pola, nacisnuŭšy na jaki možna daviedacca detali (typ złučeńnia, šyfravańnie, infarmacyja pra siertyfikat);
- idealnaja situacyja, kali bank i sajt pradaŭca padtrymlivajuć technałohiju dynamičnych parolaŭ 3D-Secure (Verified by Visa / MasterCard SecureCode), u hetym vypadku dla ździajśnieńnia kožnaj apieracyi vy budziecie atrymlivać dynamičny parol na telefon;
- paźbiahajcie vykarystańnia kartki na publičnych kampjutarach (naprykład, na pracy), a doma sačycie za abnaŭleńniami antyvirusnych prahram.
Kamientary