Šviejcarcy na refierendumie adkinuli ideju pra niedapuščalnaść sankcyj suprać Rasii
Na heta ŭkazvajuć źviestki ekzit-połaŭ i statystyčnyja madeli, pabudavanyja na asnovie pieršych vynikaŭ padliku hałasoŭ, piša BBC.
Vidavočnaja bolšaść šviejcarskich vybarcaŭ papiarednie vykazałasia na refierendumie suprać prapanovy zamacavać u Kanstytucyi takoje razumieńnie niejtralitetu krainy, jakoje vyklučała b sankcyi suprać Rasii i supracoŭnictva z NATA.
Pavodle apošnich prahnozaŭ pa vynikach refierendumu, jakija apublikavała dziaržaŭnaja teleradyjokampanija SRF, bolš za dźvie traciny prahałasavali suprać prapanovy zamacavać vuzkaje aznačeńnie ŭ Kanstytucyi Šviejcaryi. Madel instytuta gfs.bern praz 30 chvilin paśla zakančeńnia hałasavańnia pakazvała, što suprać prapanovy vykazaŭsia 71% vybarcaŭ.
Pravapapulisckaja Šviejcarskaja narodnaja partyja prapanoŭvała ŭstanavić, što Šviejcaryja moža dałučacca tolki da mižnarodnych sankcyj, uviedzienych Radaj Biaśpieki AAN. Na jaje dumku, tradycyjny niejtralitet Šviejcaryi byŭ padarvany paśla taho, jak Biern uvioŭ sankcyi suprać Rasii z pačatkam vajny va Ukrainie.
Prapanavanyja Šviejcarskaj narodnaj partyjaj papraŭki taksama praduhledžvali admovu ad ciesnaha supracoŭnictva ź jakimi-niebudź vajennymi sajuzami — kali kraina nie sutykajecca ź niepasrednaj pahrozaj napadu.
Apanienty Šviejcarskaj narodnaj partyi pradstaŭlali jaje inicyjatyvu jak prarasijskuju.
Šviejcaryja ŭ asnoŭnym dałučyłasia da sankcyj Jeŭrapiejskaha sajuza suprać Rasii, jakija byli ŭviedzieny paśla lutaha 2022 hoda. Kraina nie ŭvachodzić u NATA, ale padtrymlivaje z aljansam dastatkova ciesnyja adnosiny i biare ŭdzieł u niekatorych jaho prahramach.
Šviejcaryja abviaściła siabie niejtralnaj krainaj u 1815 hodzie, a ŭ 1848 hodzie zamacavała taki status u svajoj Kanstytucyi. Adnak tekst Kanstytucyi dapuskaje značnuju šyryniu traktovak.
U 2022 hodzie Šviejcaryja paličyła rasijskaje ŭvarvańnie va Ukrainu parušeńniem mižnarodnaha prava i dałučyłasia da sankcyj ES suprać Maskvy.
Ciapier čytajuć
«Bolš za 10 čałaviek vyjechali ŭ Jeŭropu — i heta tolki z majho adździaleńnia». Reanimatołah z rajcentra ščyra apisaŭ budni biełaruskaj miedycyny26
«Bolš za 10 čałaviek vyjechali ŭ Jeŭropu — i heta tolki z majho adździaleńnia». Reanimatołah z rajcentra ščyra apisaŭ budni biełaruskaj miedycyny
«Viedajecie, Łukašenka nie prezident». Jany tak uśmichnulisia, kiŭnuli». Departavany z Hruzii Leŭ Michiejeŭ raskazaŭ, jak ź im abychodzilisia ŭ Armienii33
Kamientary