Sudovy vykanaŭca aryštavaŭ hrošy na bałansie numary mabilnaha telefona staršyni Abjadnanaj hramadzianskaj partyi Anatola Labiedźki.
«Z učorašniaha dnia mnie nichto nie telefanuje, — paviedamiŭ palityk. — A siońnia ja pračytaŭ atrymanaje ŭčora apaviaščeńnie ab rašeńni sudovaha vykanaŭcy nakłaści aryšt na hrašovyja srodki, jakija znachodziacca i pastupajuć na zarehistravanyja numary maich telefonaŭ. Pieralik srodkaŭ budzie rabicca na depazitny rachunak adździeła prymusovaha vykanańnia Centralnaha rajona Minska».
Labiedźka paviedamiŭ, što 24 sakavika sustrakaŭsia z sudovym vykanaŭcam. «Ja skazaŭ, što, suvymiarajučy svaje mahčymaści, budu pastupova vypłačvać štrafy. Mnie zdavałasia, što my vyrašyli hetaje pytańnie, ja napisaŭ adpaviednuju papieru. Ale dziejańni byli zroblenyja nasupierak z tym, pra što my damovilisia», — skazaŭ jon.
Palityk adznačyŭ, što z vosieni minułaha hoda ŭ jaho nazapasiłasia kala 15 štrafaŭ za ŭdzieł u vuličnych akcyjach, apłačanyja dva ź ich. Ahulnuju sumu štrafaŭ Labiedźka nie padličvaŭ.
29 sakavika va UUS Leninskaha rajona Minska byŭ vyklikany były palitviazień Mikoła Statkievič. U RUUS, akramia supracoŭnikaŭ milicyi, palityka čakali i sudovyja vykanaŭcy. Jany prapanavali Statkieviču raśpisacca pad paviedamleńniem pra toje, što jon pavinien vypłacić try štrafy na ahulnuju sumu 25,2 młn rubloŭ, pryznačanych jamu sudom za ŭdzieł u niesankcyjanavanych akcyjach u Minsku. Taksama jaho papiaredzili pra mahčymyja nastupstvy ŭ vypadku niavypłaty štrafaŭ, prystrašyŭšy adklučyć mabilnuju suviaź, zabaranić karystacca aŭtamabilem i vyjazdžać za miažu.
Na dadzieny momant Statkievič dastupny pa telefonie. «Kali jany svaju pahrozu realizujuć, to heta ŭ ich budzie prablema da mianie datelefanavacca. U lubym vypadku znojdziecca mahčymaść zarehistravać na kaho-niebudź inšy telefonny numar, i tyja, kamu heta treba, jaho daviedajucca. Ja ŭvohule tut prablemy nie baču. Spałochać čałavieka, jaki ź piaci hadoŭ čatyry hady prasiedzieŭ u kamiery, zabaronaj vyjezdu prosta śmiešna. Zrazumieła, što takim čynam jany chočuć krychu pahasić aktyŭnaść», — zajaviŭ palityk.
