Departamient dziaržbiaśpieki i Druhi departamient apieratyŭnych słužbaŭ Litvy apublikavali acenku pahroz nacyjanalnaj biaśpiecy za minuły hod. Asablivaja ŭvaha ŭ dakumiencie nadadzienaja i susiedniaj Biełarusi.
«Pahrozy z boku biełaruskaj vyviedki i słužbaŭ biaśpieki», — tak nazyvajecca raździeł spravazdačy, pryśviečany biełaruskim śpiecsłužbam i ich dziejańniam na terytoryi Litvy.
Suprać Litvy vyviedvalnyja dziejańni ažyćciaŭlajuć try biełaruskija słužby, adznačajuć u spravazdačy: heta Kamitet dziaržaŭnaj biaśpieki (KDB), Hałoŭnaje vyviedvalnaje ŭpraŭleńnie hienieralnaha štaba Ministerstva abarony (HRU) i vyviedvalnyja padraździaleńni Dziaržaŭnaha pahraničnaha kamiteta (DPK).
Pavodle spravazdačy, najhałoŭnaja zadača biełaruskaj vyviedki i śpiecsłužbaŭ Biełarusi źviazanaja z zabieśpiačeńniem stabilnaści biełaruskaj ułady ŭnutry krainy i dapamohaj palityčnym i ekanamičnym intaresam krainy ŭ Litvie i ES.
Intehracyjnyja pracesy Rasii i Biełarusi, asabliva ŭ vajennaj śfiery, adznačajecca ŭ spravazdačy, taksama majuć vialiki ŭpłyŭ na dziejnaść biełaruskaj vyviedki i śpiecsłužbaŭ, što nakiravana suprać nacyjanalnaj biaśpieki Litvy i jaje intaresaŭ.
Vosieńniu 2015 hoda, havorycca ŭ spravazdačy, prachodzili «vybary» prezidenta Biełarusi, tamu KDB uzmacniŭ kantrol za dziejučymi ŭ Litvie pradstaŭnikami biełaruskaj apazicyi.
«Asnoŭnaja zadača KDB zaklučałasia ŭ tym, kab pieraškodzić apazicyjanieram prytrymlivacca adzinaj palityki ŭ chodzie vybaraŭ prezidenta, — adznačajuć u DDB. — Biełaruskija sakretnyja słužby, źbirajučy infarmacyju pra dziejučyja ŭ Litvie biełaruskija apazicyjnyja arhanizacyi, viarbujuć členaŭ biełaruskaj supołki Litvy i hramadzian Biełarusi, jakija pražyvajuć u našaj krainie».
KDB taksama sprabuje ŭkaranić svaich ahientaŭ u biełaruskija apazicyjnyja arhanizacyi i zaachvočvaje ich udzieł u mierapryjemstvach apazicyi ŭ Litvie.
«Asnoŭnaja meta KDB pry viarboŭcy krynic infarmacyi i ahientaŭ upłyvu ŭ apazycyjnyja arhanizacyi zaklučajecca ŭ tym, kab jana była raskołataja, kab nie dazvalać joj stać realnaj palityčnaj alternatyvaj ciapierašniaj biełaruskaj uładzie», — padkreślivajecca ŭ spravazdačy DDB.
U 2015 hodzie KDB aktyŭna padtrymlivała namahańni biełaruskich uładaŭ pa źniaćci sankcyj ES u dačynieńni da biełaruskich čynoŭnikaŭ i kampanij.
«Supracoŭniki KDB źbirali infarmacyju ab pazicyi Litvy i ES z nahody spynieńnia sankcyj i šukali łabistaŭ palityčnych i ekanamičnych intaresaŭ siarod biznesmienaŭ Litvy, biznes jakich źviazany ź Biełaruśsiu», — havorycca ŭ dakumiencie.
Pavodle spravazdačy, KDB pastajanna sprabuje znajści padychodziačych dla viarboŭki kandydataŭ u litoŭskich dziełavych kołach, siarod palitykaŭ, dziaržaŭnych słužačych, na jakich možna akazać upłyŭ u suviazi ź ich intaresami ŭ Biełarusi.
Biełaruskija KDB i HRU ŭ Litvie pastajanna karystajucca tradycyjnym dypłamatyčnym prykryćciom, adznačajuć u spravazdačy.
«Pałova dypłamataŭ biełaruskaj ambasady ŭ Litvie źjaŭlajucca supracoŭnikami KDB i HRU, jakija pracujuć pad dypłamatyčnym prykryćciom, albo źviazanyja z hetymi słužbami i vykonvajuć ich zadańni», — skazana ŭ spravazdačy.
Supracoŭniki biełaruskaj vyviedki i słužbaŭ biaśpieki vykonvajuć u Litvie zadańni pad vyhladam biznesmienaŭ, žurnalistaŭ, navukoŭcaŭ, a taksama členaŭ dziaržaŭnych i dziełavych delehacyj Biełarusi.
Biełaruskija śpiecsłužby zacikaŭlenyja ŭ kantroli i raskole biełaruskich apazicyjanieraŭ, jakija žyvuć u Litvie, adnak u spravazdačy adznačajecca, što biełaruskija śpiecsłužby dziejničajuć u Litvie aściarožniej za rasijskija, paźbiahajučy ahresiŭnych dziejańniaŭ. Tym nie mienš, na svajoj terytoryi, u Biełarusi, jany bolš aktyŭnyja i ahresiŭnyja ŭ svajoj dziejnaści, nakiravanaj suprać intaresaŭ Litvy.
U 2015 hodzie zastałasia raniejšaja tendencyja ŭ płanie sprobaŭ viarboŭki litoŭskich hramadzian. Sa sprobami śpiecsłužbaŭ Biełarusi zavierbavać čaściej za ŭsio sutykalisia prybyvajučyja ŭ Biełaruś supracoŭniki pravaachoŭnych orhanaŭ Litvy.
Maštaby viarboŭki supracoŭnikaŭ litoŭskich pravaachoŭnych orhanaŭ nie źmianilisia. KDB pry sadziejničańni pamiežnaj słužby Biełarusi taksama vierbavała žycharoŭ pamiežnych terytoryj, jakija časta naviedvajuć Biełaruś, nie źjaŭlajucca čynoŭnikami, adnak, znajomyja ź ludźmi, jakija pracujuć u śfiery pravaachoŭnych orhanaŭ Litvy i ŭ vyviedcy.
Intares biełaruskaha HRU ŭ Litvie pa sutnaści supadaje ź intaresami rasijskaj vajennaj vyviedki, — skazana ŭ spravazdačy. Dziejničajučy suprać Litvy i inšych krain NATA, vajennaja vyviedka Rasii i Biełarusi znachodziacca ŭ ciesnym supracoŭnictvie. Biełaruskaja vajennaja vyviedka, jak i KDB, bolš aktyŭna i bolš ahresiŭna dziejničaje suprać Litvy z terytoryi Biełarusi, havorycca ŭ spravazdačy.
U Litvie ŭ dadzieny momant idzie sud nad dvuma ahientami HRU. Dziejnaść biełaruskaj vyviedki i słužbaŭ biaśpieki aceńvajecca jak pahroza intaresam nacyjanalnaj biaśpieki Litvy, zaklučaje raździeł spravazdačy, pryśviečany Biełarusi.
