Jašče minułym letam na internet‑partał u sud padała jurydyčnaja hrupa «Arhumient'».
Pryčyna — publikacyja na sajcie artykułu «Siamja» robić biznes. Pad nadziejnym dacham dziaržavy». Na dumku pazoŭnikaŭ, artykuł nanosiŭ škodu dziełavoj reputacyi tavarystva i jaho zasnavalnika Andreja Leanidaviča Kozika, syna staršyni FPB. Pretenzii vykazvalisia da nastupnaj frazy: «Syn hałoŭnaha łukašenkaŭskaha prafsajuźnika Leanida Kozika stvaryŭ jurydyčnuju firmu «Arhumient'», jakaja łabiruje intaresy zamiežnych pradpryjemstvaŭ i bujnaha pryvatnaha biznesu ŭ dziaržstrukturach. Faktyčna atrymlivajecca, što Andrej Kozik raznosić pa vysokich kabinetach hrošy za toj ci inšy podpis».
AHP nie źjaŭlajecca ŭładalnicaj sajtu www.ucpb.org. U partyi havorać, što heta nie partyjny sajt, a resurs prychilnikaŭ partyi i chostynh na jaho naležyć nia im.
U žniŭni navat pačaŭsia sudovy praces, jaki ŭ chutkim časie ścich. Jak vyśvietliłasia, uvieś hety čas vyśviatlałasia, ci nasamreč dadzieny sajt źjaŭlajecca ŭłasnaściu AHP.
25 sakavika, na Dzień Voli, sudździa Neli Arłoŭskaja vyniesła rašeńnie pavodle jakoha pryznała, što sajt www.ucpb.org. abraziŭ dziełavuju reputacyju jurydyčnaj hrupy «Arhumient'» i pastanaviŭ apublikavać abviaržeńnie infarmacyi na dadzienym sajcie, a taksama na partale www.tut.by. Kasacyjnaja skarha siabroŭ AHP 24 krasavika taksama była adchilenaja.
«Na sajcie www.ucpb.org. drukavałasia častka partyjnych materyjałaŭ i dakumentaŭ, ale bolšaść publikacyj nia mieli nijakaha dačynieńnia da AHP, — kaža lider partyi Anatol Labiedźka. Nakolki pretenzii adnosna publikacyj na sajcie mieli niekalki arhanizacyj. Ciapier, miarkuju, jany taksama mohuć źviarnucca ŭ sud. Heta biesprecedentny vypadak».
Pa słovach jurysta AHP Siarhieja Alfiera, u suda isnavała tolki dva dokazy, što sajt www.ucpb.org. moža naležyć AHP — heta partyjnyja blanki ŭzoru 2001 — 2003 hodu, a taksama list u Ministerstva justycyi za 2003 hod, dzie paznačalisia adras internet‑staronki.
«Ale partyja nie prymała nijakaha rašeńnie ab stvareńni sajtu, nie płacić za damen i chostynh. Nam skazali, što na staroncy publikujucca partyjnyja dakumenty i artykuły siabroŭ AHP. Ale heta ŭsio adno, kab ja pryjšoŭ da siabry ŭ hości paśla pasvaryŭsia i padaŭ na jaho ŭ sud. A sud pryniaŭ moj bok i pryznaŭ mianie ŭładalnikam kvatery tolki tamu, što ja tam byŭ. Poŭny absurd» — kaža S.Alfier.
Rašeńnie jašče budzie abskardžvacca ŭ Vyšejšym haspadarčym sudzie.
