Polskija pradprymalniki hatovyja pryciahnuć u Biełaruś zamiežnyja kredytnyja linii. Pra heta zajaviŭ siońnia žurnalistam na kantaktna-kaapieracyjnaj biržy I Mižnarodnaha forumu-vystavy dziełavych kantaktaŭ «Brest-2016» staršynia Polska-biełaruskaj handlova-pramysłovaj pałaty Kazimiež Zdunoŭski.
«Z Polščy pradprymalniki pryjazdžajuć nie tolki dla taho, kab pahavaryć pra biznes. Jany taksama hatovyja prapanavać finansavańnie kankretnych inviestycyjnych prajektaŭ. U Biełarusi jość šmat dobra adukavanych ludziej, ale nie chapaje finansaŭ i nou-chau. Polskija pradprymalniki i adnym, i druhim vałodajuć. U ich jość i svaje, i jeŭrapiejskija inavacyi, užo pravieranyja ŭ Jeŭrasajuzie, a taksama jość mahčymaść pryciahnuć zamiežnyja kredytnyja linii. Heta vielmi važna», — adznačyŭ Kazimiež Zdunoŭski.
Jon vysoka adhukaŭsia pra dziełavyja jakaści biełaruskich partnioraŭ. «Tut pracujuć ludzi, jakija razumiejuć biznes, — heta vielmi važna. Jany prapanujuć kankretnyja, žyvyja prajekty. Spadziajusia, što hetaja sustreča budzie karysnaja i dla polskaha, i dla biełaruskaha biznesu», — skazaŭ kiraŭnik PBHPP.
Polskaja delehacyja — samaja vialikaja siarod haściej forumu dziełavych kantaktaŭ. U jaje skład uvajšli bolš za 60 čałaviek. Heta pradstaŭniki bujnych pradpryjemstvaŭ, tavarnych biržaŭ, administracyjnych orhanaŭ kiravańnia z Varšavy, Lublina, Siedlec, Białaj-Padlaskaj, Hajnaŭki. Pa słovach Kazimieža Zdunoŭskaha, mnohija pradprymalniki pryjechali na kantaktna-kaapieracyjnuju biržu ź biełaruskimi pradpryjemstvami z hatovymi prapanovami i dakumientami, pa jakich mahčyma zaklučyć papiarednija damovy i pačać pracavać.
Na jaho dumku, aktualnymi kirunkami dla supracoŭnictva ciapier źjaŭlajucca enierhietyka, drevaapracoŭka, meblevaja vytvorčaść. Ich raźvićciu, a taksama temie mižrehijanalnaha supracoŭnictva, u pryvatnaści, budzie pryśviečany i čarhovy polska-biełaruski ekanamičny forum «Dobrasusiedstva», jaki projdzie 23-24 červienia ŭ Homieli.
Ciapier čytajuć
«Heta była žyvaja kamiera sačeńnia». Što rabiła viciablanka Kaciaryna, kab vyzvalicca praz 5 hadoŭ zamiest prysudžanych 12 hadoŭ10
Kamientary