Siońnia adznačajecca Suśvietny dzień svabody presy

U Biełarusi hetaje śviata tolki ŭ tradycyjach niezaležnych vydańniaŭ. Aficyjny Miensk pa-raniejšamu razhladaje ŭ jakaści Dnia druku 5 traŭnia – dzień vychadu ŭ 1912 hodzie pieršaha numaru leninskaj «Pravdy». Pavodle amerykanskaj arhanizacyi «Freedom House», Biełaruś znachodzicca na 185 miescy pavodle stupieni svabody ŚMI sa 194-och dziaržavaŭ śvietu.

Siońnia ŭ Londanie na mižnarodnaj kanferencyi ŭ Suśvietny dzień svabody presy zaplanavany vystup namieśnika staršyni Biełaruskaj asacyjacyi žurnalistaŭ Andreja Bastunca. Voś što jon paviedamiŭ specyjalna dla Radyjo Svaboda.

(Bastuniec: ) «U adnym intervale času buduć taksama vystupać pradstaŭniki srodkaŭ masavaj infarmacyi Nepału dy Iraku. Heta nie alfabetny vybar. Pavodle arhanizataraŭ, mienavita takim bačycca miesca Biełarusi va ŭsiaśvietnaj prastory, što tyčycca svabody słova».

Sa słoŭ surazmoŭcy, sioleta ŭ rejtynhavym śpisie dziaržavaŭ śvietu, jaki adlustroŭvaje stupień svabody druku, Biełaruś apuściłasia na 186-ju pazycyju. Pobač – Paŭnočnaja Kareja, Kuba dy Livija. Jak kaža Andrej Bastuniec, ŭ Londanie jon paviedamić pra dalejšaje ŭzmacnieńnie cisku na biełaruskuju niezaležnuju presu.

(Bastuniec: ) «Hazety ciapier nia mohuć dajści da čytača. Telebačańnie j radyjo naŭprost padparadkavanyja ŭładam. A niezaležnych žurnalistaŭ zatrymlivajuć dy źbivajuć».

Suśvietnaja hazetnaja asacyjacyja (WAN) dy Suśvietny forum redaktaraŭ (WEF) zaklikajuć ŭłady Biełarusi spynić aryšty žurnalistaŭ i pieraśled niezaležnych srodkaŭ masavaj infarmacyi. U niadaŭnim aficyjnym liście ŭ Miensk padajucca proźviščy bolš jak 35 biełaruskich žurnalistaŭ i amal 20 zamiežnych, u dačynieńni da jakich užytaja dyskredytacyja. Adnak Biełaruś u čarhovy raz parušyła Ŭsieahulnuju deklaracyju pravoŭ čałavieka, zajaviła dniami pradstaŭnica Eŭraźviazu Kryścina Helak.

(Helak: ) «Žurnalistam z Polščy nie dazvolili ŭjezd u Biełaruś, kab jany mahli aśviatlać padziei. Takija pavodziny z boku ŭłady nia majuć apraŭdańniaŭ. My nia možam padzialać takija pavodziny».

Pavodle manitorynhu Biełaruskaj asacyjacyi žurnalistaŭ, na siońnia spynienaje vydańnie «BDH.Biełorusskoj diełovoj haziety», hazetaŭ «Salidarnaść», «Birža informacii». «Narodnaja vola» j «Tovariŝ» vymušany drukavacca za miažoju. 19 niezaležnych hazetaŭ nielha kupić u šapikach «Sajuzdruku». Pazovy redakcyjaŭ i čytačoŭ vydańniaŭ, vykinutych z padpisnych katalohaŭ, sudy admaŭlajucca razhladać.

Suśvietny dzień svabody presy zasnavany 13 hadoŭ tamu Arhanizacyjaj Abjadnanych Nacyjaŭ. Heta adbyłosia pavodle inicyjatyvy pradstaŭnikoŭ niezaležnaha druku krainaŭ Afryki. U zaćvierdžanaj imi Vindchukskaj deklaracyi «najvažniejšaj častkaj kožnaj demakratyčnaj dziaržavy źjaŭlajecca svabodnaja, pluralistyčnaja j niezaležnaja presa».

Radyjo Svaboda

• 0
• 0
• 0
• 0
• 0
• 0
• 0
• 0