Zhodna z abnoŭlenym makraekanamičnym prahnozam Suśvietnaha banka, VUP Biełarusi moža źnizicca ŭ 2016 hodzie na 3%. Prezientacyja ekanamičnaha prahnozu adbyłasia 28 krasavika ŭ Minsku.
Vosieńniu 2015 hoda Suśvietny bank prahnazavaŭ, što biełaruski VUP skarocicca ŭ hetym hodzie na 0,5%. Paharšeńnie makraekanamičnaha prahnozu bank tłumačyć nizkim uzroŭniem cen na naftu, słabymi pierśpiektyvami rostu rasijskaj ekanomiki, jakaja spažyvaje asnoŭny abjom ekspartavanych Biełaruśsiu tavaraŭ.
«Uździejańnie źniešnich faktaraŭ na biełaruskuju ekanomiku praciahniecca, z pryčyny čaho prahnazujecca źnižeńnie realnaha VUP na 3% u 2016 hodzie i na 1% u 2017 hodzie. Prahnazujecca, što siaredniesuśvietny ŭzrovień cen na naftu moža skłaści 41 dołar za barel u 2016 i 50 dołaraŭ za barel u 2017 hodzie, a adnaŭleńnie rasijskaj ekanomiki budzie pavolnym», — havorycca ŭ makraekanamičnym prahnozie Suśvietnaha banka.
Na dumku ekanamistaŭ banka, prahres u halinie strukturnych reformaŭ moža palepšyć pierśpiektyvy Biełarusi ŭ siarednieterminovym pieryjadzie, «adnak nieadkładnaje adnaŭleńnie tempaŭ rostu małavierahodna z pryčyny słabaj dyviersifikacyi pradukcyi i rynkaŭ zbytu, asabliva ŭ vypadku dziaržaŭnych pradpryjemstvaŭ».
Na dumku ekśpiertaŭ Suśvietnaha banka, ekanamičny rost u krainie možna stymulavać za košt reformaŭ. Restrukturyzacyja siektara dziaržpradpryjemstvaŭ, ličać jany, «vielmi važnaja dla skaračeńnia ŭmiašańnia dziaržavy, jakoje vyklikaje pierakosy, i pavyšeńnia efiektyŭnaści pracy pradpryjemstvaŭ».
«Pradpryjemstvam dziaržaŭnaha siektara varta pierajści ad daviedzienych da ich kolkasnych metavych pakazčykaŭ i pakazčykaŭ zaniataści da pakazčykaŭ pradukcyjnaści i rentabielnaści, što pavinna supravadžacca uzmacnieńniem samastojnaści ich mieniedžmientu za košt farmiravańnia naležnych miechanizmaŭ karparatyŭnaha kiravańnia», — havorycca ŭ ahladzie Suśvietnaha banka.
Pry hetym ekśpierty nie vyklučajuć, što ŭ vypadku adsutnaści reformaŭ u Biełarusi mahčymy i bolš hłyboki ekanamičny spad u paraŭnańni z tym, jaki prahnazujecca.
«Zachoŭvajucca značnyja ryzyki. Bolš rezkaje zapavoleńnie ekanamičnaj aktyŭnaści na źniešnich rynkach moža pryvieści da pahłybleńnia spadu, asabliva z ulikam taho, što na dolu praduktaŭ minieralnaha pachodžańnia i uhnajeńniaŭ prypadaje bolš za treć sukupnaha ekspartu», — kanstatujuć ekanamisty Suśvietnaha banka.
Mižnarodny valutny fond u krasaviku taksama pierahledzieŭ u bok paharšeńnia dynamiku prahnazavanych ekanamičnych pakazčykaŭ Biełarusi. Pavodle acenki fondu, VUP Biełarusi moža źnizicca na 2,7% (raniej fond prahnazavaŭ, što ekanamičny spad składzie 2,2%).
Miž tym aficyjny prahnoz biełaruskich uładaŭ na hety hod pakul nie karektavaŭsia i praduhledžvaje, što VUP vyraście na 0,3%. U pieršym kvartale VUP źniziŭsia na 3,6% u paraŭnańni z anałahičnym pieryjadam minułaha hoda.
