Uradženiec vioski Mialeškavičy Mazyrskaha rajona Homielskaj vobłaści 1959 hoda naradžeńnia pražyvaŭ u Kałodziščach Minskaha rajona.
Jon byŭ žanaty, u 2007 hodzie ŭ jaho naradziŭsia syn. Siamiejnaja idylija doŭžyłasia niadoŭha: u kastryčniku 2010 hoda muž i žonka raźvialisia, a dzicia zastałosia z maci. Sud ustanaviŭ paradak znosin baćki z synam, adnak u śniežni 2011 hoda jon byŭ źmienieny.
Da dasiahnieńnia dziciem siamihadovaha ŭzrostu mužčynu dazvolili bačycca z synam tolki ŭ prysutnaści maci. Jon sprabavaŭ abskardzić heta ŭ sudzie, ale ŭsio było biezvynikova.
Kali dziciaci spoŭniłasia siem hadoŭ, byłaja žonka znoŭ źviarnułasia ŭ sud z patrabavańniem abmiežavać znosiny baćki z synam. Jana matyvavała heta tym, što adkazčyk viadzie siabie niedastojna, naprykład, trojčy prychodziŭ da dziciaci pjanym i davaŭ synu pradukty, užyvać jakija zabaranili chłopčyku daktary. Žančyna prasiła padoŭžyć paradak znosin dziciaci z eks-mužam u jaje prysutnaści da dasiahnieńnia chłopčykam dziesiacihadovaha ŭzrostu. U svaju čarhu mužčyna skardziŭsia, što byłaja žonka zabaraniaje jamu bačyć syna.
U vyniku sud admoviŭ žančynie ŭ zadavalnieńni patrabavańniaŭ ab abmiežavańni prava byłoha muža na znosiny ź dziciem. Patrabavańni mužčyny sud zadavoliŭ častkova i vyznačyŭ kankretny paradak udziełu baćki ŭ vychavańni dziciaci.
Ciapier mužčyna mieŭ prava mieć bačycca z synam u druhuju subotu kožnaha miesiaca z 11.00 da 13.00 u sacyjalna-piedahahičnym centry Pieršamajskaha rajona Minska ŭ prysutnaści piedahoha-psichołaha i biez žonki. Akramia taho, bačyć dzicia jon moh kožnuju sieradu z 18.30 da 20.00 u prysutnaści byłoj žonki padčas naviedvańnia parkaŭ, dziciačych kaviarniaŭ, mahazinaŭ i kulturna-vidoviščnych mierapryjemstvaŭ dla dziaciej.
Taki paradak rečaŭ mužčynu nie zadavoliŭ, i jon źviarnuŭsia z nahladnaj skarhaj u Viarchoŭny sud, jaki vyrašyŭ, što sprečka pamiž baćkami była vyrašanaja pravilna, bo śpiecyjalisty vyjavili ŭ dziciaci vysoki ŭzrovień prychilnaści da maci. Pry hetym było ŭstanoŭlena, što ŭ suviazi z kanfliktam pamiž baćkami dzicia znachodzicca ŭ składanym psichaemacyjnym stanie, jaho naturalnaja ŭzrostavaja niaśpiełaść značna abmiažoŭvaje mahčymaść samastojna vyznačyć svajo staŭleńnie da baćki.
