Vinsent stavić kropku ŭ muzyčnym siezonie kancertam u Minsku

Vykanaŭca razam z žyvym składam zajhraje svaje najlepšyja pieśni ŭ miežach prajektu «Žyvy Tuzin» 22 maja ŭ kłubie ILI.

Solny kancert Vinsenta stanie apošnim u muzyčnym siezonie prajektu «Žyvy Tuzin» i zaklučnym u tury samoha vykanaŭcy pa Biełarusi ŭ padtrymku svajho novaha alboma «Vir». «Uviesnu ja abjeździŭ usie najvialikšyja harady Biełarusi z vystupami. Pabačyŭ jak žyvie kraina. Na kancerty prychodzili cikavyja ludzi, mianie natchniali padarožžy pa krainie. My majem šmat pryhožych haradoŭ, u jakich žyvuć fajnyja ludzi. Kancert u Minsku budzie takoj finalnaj kropkaj turu pa Biełarusi. I my z muzykami zrobim usio, kab jon zapomniŭsia słuchačam nadoŭha», – abiacaje vykanaŭca. Pierad Minskam u jaho zapłanavany taksama vystup u Łondanie – druhi za apošnija paŭhady.

Vinsent viarnuŭsia pry kancy 2015 hodu ŭ muzyčnuju prastoru z novaj prahramaj paśla amal šaścihadovaha pierapynku, jaki byŭ vyklikany adjezdam z krainy, zdymkami ŭ kino i vandroŭkami pa śviecie. 16 śniežnia muzyka paćvierdziŭ, što znachodzicca ŭ vydatnaj formie, kali prezientavaŭ užyvuju svoj albom «Vir». Pracu vysoka acanili jak słuchačy, tak i muzyčnyja eksperty. Reliz trapiŭ u piaciorku najlepšych biełaruskich albomaŭ hodu pa viersii Experty.by i byŭ adznačany ŭ asabistych rejtynhach biełaruskich i zamiežnych krytykaŭ. «Heta na dziva śpieły sensavy pradukt. Aŭtar vyras u fiłosafa, hramadzianina śvieta, mužčynu, jaki maje dośvied u žyćci, ale ŭsio jašče zdolny tonka adčuvać», – vykazaŭ svajo zachapleńnie viadučy pieradačy «Vidźmo-Nievidźmo» Siarhiej Filimonaŭ. «Ja ŭražany aryhinalnym padychodam i miełodykaj biełaruskaj movy!», – zaznačyŭ muzyčny ahladalnik Newsweek Polska Jacek Skalimoŭski. «Biełaruskaj movy ja nie viedaju, ale vyrašyŭ davierycca adčuvańniam – u jaho dakładny fłoŭ i dobra spradusavany bit, tak što ja vieru ŭ toje, što jon niestanie čytać aby što», – adznačyŭ aŭtar łatyskaha muzyčnaha partała Intro.lv Łaŭrys Anstraŭcs.

Vinsent vystupić 22 maja ź vialikaj prahramaj, kudy ŭvojduć jak pieśni z albomu «Vir», tak i abranyja raniejšyja śpievy. «Vykanajem najlepšaje, budziem miksavać žyvuju muzyku i elektronnuju, impravizavać, ekśpierymientavać, tak što sumna nie budzie!», – kaža vykanaŭca. Vystupać jon budzie razam z vydatnymi muzykami Michaiłam Maryničavym, Siaržukom Padlivachinym i Ramanam Sarakaletavym.

NABYĆ KVITOK NA KANCERT ANŁAJN

Papiarednie kvitki taksama možna nabyć z 4.05 ŭ kłubie ILI (pr-t Niezaležnaści, 131/1) i ŭ punktach prodažu pa Miensku.

Afiša

22.05 (niadziela). 19:00. Klub ILI (pr-t Niezaležnaści, 131/1). Vinsent z prahramaj «Najlepšyja pieśni». Košt kvitka (tolki tancplac) — 100 000 (proma-košt da 9.05), 150 000 (astatnija), 200 000 (u dzień, pry najaŭnaści). Infa: +375 29 687-20-93.

Admysłova da kancertu Tuzin.fm ukłaŭ składanku z najlepšych piesień Vinsenta.

• 0
• 0
• 0
• 0
• 0
• 0
• 0
• 0