U Homieli na Dzień Pieramohi školnicu paprasili źniać hieorhijeŭskuju stužku, baćki aburanyja
Cikavy vypadak adbyŭsia na śviatkavańni 9 Maja ŭ homielskaj škole №29.
Baćka adnoj z vučanic Viktar Hryboŭski napisaŭ na svajoj staroncy ŭ «Adnakłaśnikach»: «Siońnia, 9 maja 2016 hoda, na paradzie ŭ honar dnia pieramohi, maju dačku (12 hadoŭ) piedahohi sa škoły vyvieli z šerahu za najaŭnaść hieorhijeŭskaj stužački!!!!!!!!!!!!!!!!!!!!!!!!!!! Z dniom pieramohi! Biełaruś Homiel!!!» [Zachavanaja aŭtarskaja punktuacyja – «NN»].
Hety dopis sabraŭ vializny vodhuk u «Adnakłaśnikach» — zvyš za 5 tysiač łajkaŭ i amal tysiača kamientaŭ. Pryjšła vialikaja kolkaść kamientataraŭ z Rasii, jakija aburajucca takimi pavodzinami školnaj administracyi.
Sam Viktar Hryboŭski ŭ dalejšych kamientach adznačyŭ: «Kali tak i dalej pojdzie, to dva varyjanty — emihracyja ci majdan». «Chutčej za ŭsio, heta palityka kiraŭnictva krainy», — robić vysnovy baćka vučanicy. «Heta haniebna, chutka na łob taŭro buduć stavić», — dalej aburajecca jon.
«Naša Niva» patelefanavała dyrektaru SŠ №29 Homiela Uładzimiru Alaksandraviču Sieladcovu, kab jon padzialiŭsia svaim bačańniem incydentu. Dyrektar byŭ u kursie hetaha vypadku.
«Usio było nie tak. Jaje nichto nie vyvodziŭ z šerahu, a pytańnie my ŭzhadnili z maci dziaŭčynki, ja asabista ź joj razmaŭlaŭ. Jana pahadziłasia z našymi arhumientami, — kaža spadar Sieladcoŭ. — U nas było ŭkazańnie, što ŭsie dzieci ŭ «žyvym kalidory» na śviatkavańni Dnia Pieramohi pavinny byli być z butańjerkami ź jabłynievym ćvietam. Nichto ź jaje nie zdymaŭ hieorhijeŭskuju stužku, ale maja namieśnica pa ideałahičnaj pracy patłumačyła, što tut va ŭsich pavinna być adzinaja forma adzieńnia. Paśla paŭhadziny ŭračystaj častki jana mahła chadzić ź luboj stužkaj. Našy arhumienty byli pryniatyja, i vučanica nadzieła butańjerku ź jabłynievym ćvietam. Heta ŭžo sami baćki razdźmuli skandał».
Hieorhijeŭskaja stužka stała simvałam rasijskaj ahresii na ŭschodzie Ukrainy. U vyniku svaje ŭnikalnyja stužki Pieramohi byli stvoranyja jak u Biełarusi, hetak i ŭ Kazachstanie. Ćviet jabłyni — mirny simvał, nie ahresiŭny.
Viktar Hryboŭski pościć taksama na svajoj staroncy spasyłki, dzie stužka jabłynievaha ćvietu nazyvajecca «łuchtoj».
Praź niejki čas u redakcyju patelefanavała maci dziaŭčynki, jana zapeŭnivała, što incydent vyčarpany, a hieorhijeŭskija stužki dla jaje siamji źjaŭlajucca śviatymi simvałami. I siamja budzie nadalej nasić i šanavać ich.
Sam Viktar Hryboŭski vydaliŭ svaju publikacyju praz paŭhadziny paśla taho, jak karespandent «NN» patelefanavaŭ dyrektaru škoły.
Ciapier čytajuć
Dźmitryja Łukašenki nie było z baćkam i bratami na adznačeńni 3 Lipienia24
Kamientary