У Гомелі на Дзень Перамогі школьніцу папрасілі зняць георгіеўскую стужку, бацькі абураныя
Цікавы выпадак адбыўся на святкаванні 9 Мая ў гомельскай школе №29.
Бацька адной з вучаніц Віктар Грыбоўскі напісаў на сваёй старонцы ў «Аднакласніках»: «Сёння, 9 мая 2016 года, на парадзе ў гонар дня перамогі, маю дачку (12 гадоў) педагогі са школы вывелі з шэрагу за наяўнасць георгіеўскай стужачкі!!!!!!!!!!!!!!!!!!!!!!!!!!! З днём перамогі! Беларусь Гомель!!!» [Захаваная аўтарская пунктуацыя – «НН»].
Гэты допіс сабраў вялізны водгук у «Аднакласніках» — звыш за 5 тысяч лайкаў і амаль тысяча каментаў. Прыйшла вялікая колькасць каментатараў з Расіі, якія абураюцца такімі паводзінамі школьнай адміністрацыі.
Сам Віктар Грыбоўскі ў далейшых каментах адзначыў: «Калі так і далей пойдзе, то два варыянты — эміграцыя ці майдан». «Хутчэй за ўсё, гэта палітыка кіраўніцтва краіны», — робіць высновы бацька вучаніцы. «Гэта ганебна, хутка на лоб таўро будуць ставіць», — далей абураецца ён.
«Наша Ніва» патэлефанавала дырэктару СШ №29 Гомеля Уладзіміру Аляксандравічу Селядцову, каб ён падзяліўся сваім бачаннем інцыдэнту. Дырэктар быў у курсе гэтага выпадку.
«Усё было не так. Яе ніхто не выводзіў з шэрагу, а пытанне мы ўзгаднілі з маці дзяўчынкі, я асабіста з ёй размаўляў. Яна пагадзілася з нашымі аргументамі, — кажа спадар Селядцоў. — У нас было ўказанне, што ўсе дзеці ў «жывым калідоры» на святкаванні Дня Перамогі павінны былі быць з бутаньеркамі з яблыневым цветам. Ніхто з яе не здымаў георгіеўскую стужку, але мая намесніца па ідэалагічнай працы патлумачыла, што тут ва ўсіх павінна быць адзіная форма адзення. Пасля паўгадзіны ўрачыстай часткі яна магла хадзіць з любой стужкай. Нашы аргументы былі прынятыя, і вучаніца надзела бутаньерку з яблыневым цветам. Гэта ўжо самі бацькі раздзьмулі скандал».
Георгіеўская стужка стала сімвалам расійскай агрэсіі на ўсходзе Украіны. У выніку свае ўнікальныя стужкі Перамогі былі створаныя як у Беларусі, гэтак і ў Казахстане. Цвет яблыні — мірны сімвал, не агрэсіўны.
Віктар Грыбоўскі посціць таксама на сваёй старонцы спасылкі, дзе стужка яблыневага цвету называецца «лухтой».
Праз нейкі час у рэдакцыю патэлефанавала маці дзяўчынкі, яна запэўнівала, што інцыдэнт вычарпаны, а георгіеўскія стужкі для яе сям’і з’яўляюцца святымі сімваламі. І сям’я будзе надалей насіць і шанаваць іх.
Сам Віктар Грыбоўскі выдаліў сваю публікацыю праз паўгадзіны пасля таго, як карэспандэнт «НН» патэлефанаваў дырэктару школы.
Цяпер чытаюць
33-гадовы Даніла Гаркавы, які нечакана пакінуў Офіс Ціханоўскай, расказаў пра сваю анкалогію і сем аперацый2
33-гадовы Даніла Гаркавы, які нечакана пакінуў Офіс Ціханоўскай, расказаў пра сваю анкалогію і сем аперацый
«Мінімальны заробак доктара ў Польшчы большы, чым я мела ў беларускім прыватным цэнтры». Доктарка Маркелава — пра працу ў польскай бальніцы і выраб натуральнай касметыкі1111
Каментары