Šunievič: MUS praviaraje infarmacyju pra ŭdzieł biełaruskich padletkaŭ u vajenizavanych łahierach u Rasii
MUS praviaraje infarmacyju pra ŭdzieł biełaruskich padletkaŭ u vajenizavanych łahierach na terytoryi Rasii, paviedamiŭ 25 maja žurnalistam ministr unutranych spraŭ Biełarusi Ihar Šunievič.
16 maja «Naša niva» apublikavała artykuł, u jakim paviedamlałasia pra toje, što rasijskija nieanacysty, jakija majuć dośvied bajavych dziejańniaŭ u składzie niezakonnych uzbrojenych farmiravańniaŭ samaabvieščanych DNR i ŁNR, pravodzili zaniatki z padletkami ź Biełarusi. Tekst supravadžaŭsia fotamateryjałami.
«Infarmacyja praviarajecca. Pra vyniki pakul rana havaryć», — skazaŭ jon.
Na pytańnie, jak budzie reahavać MUS u vypadku, kali rasijskija nacyjanalisty zachočuć pravieści ŭ Biełarusi svoj źlot, Šunievič adkazaŭ: «Apieratyŭnaj infarmacyi, jakaja mahła b śviedčyć pra taki namier, my nie atrymali. Kali chtości budzie pravodzić luboje mierapryjemstva z parušeńniem dziejnaha zakona, my budziem na heta reahavać. Jość zakon ab masavych mierapryjemstvach, jon raspaŭsiudžvajecca na ŭsich. Kali takija mierapryjemstvy buduć niesankcyjanavana prachodzić, parušajučy naša zakanadaŭstva ŭnutranaje, biezumoŭna, orhany ŭnutranych spraŭ buduć reahavać».
Adkazvajučy na pytańnie, ci moža być zatrymany ŭ Biełarusi rasijski hramadzianin, jaki vajavaŭ va Ukrainie na baku tak zvanaj DNR, ministr zajaviŭ: «Mohuć zatrymać pry najaŭnaści pravavych padstaŭ».
U liku takich padstaŭ jon nazvaŭ raspačynańnie kryminalnaj spravy i abjaŭleńnie čałavieka ŭ vyšuk. «Moža być abranaja miera strymańnia i daručana nam, pravaachoŭnym orhanam Biełarusi, ažyćciavić jaho zatrymańnie i hetak dalej. Kali takija akaličnaści buduć ustanoŭlenyja — značyć, budziem reahavać. Kali takich abstavin nie budzie, budziem reahavać z punktu hledžańnia mahčymaha parušeńnia našaha ŭnutranaha zakanadaŭstva», — skazaŭ Šunievič.
Sotni rubloŭ, kab efiektna daviedacca poł budučaha dziciaci: biełarusy robiać usio bolš maštabnyja hiendar-paci3
Kamientary