U mahiloŭskich kniharniach paźnikali z prodažu i kramnych vitryn hlobusy, na jakich było paznačana, što Krym častka Rasiei.
Zdaryłasia heta nieŭzabavie paśla taho, jak Upraŭleńnie handlu i pasłuh Mahiloŭskaha abłvykankamu «rekamendavała haradzkim subjektam handlu paźbiahać prodažu palityčnych mapaŭ śvietu i hlobusaŭ, na jakich terytaryjalnaja prynaležnaść Krymu adroźnivajecca ad ahulnapryznanaj suśvietnaj supolnaściu».
List z tłumačeńniem takoj pazycyi Ŭpraŭleńnie handlu dasłała pieršamu namieśniku staršyni Biełaruskaj Sacyjał-demakratyčnaj partyi «Hramada» Ihara Barysavu. Partyjec damahaŭsia, kab hlobusy «z rasiejskim Krymam» prybrali z prodažu, bo takaja pradukcyja, davodziŭ aktyvist, uvodzić u zman pakupnikoŭ i supiarečać aficyjnaj pazycyi Biełarusi pa Krymu.
«Toje, što ŭłada pačuła hołas pratestu suprać prodažu hlobusaŭ «z rasiejskim Krymam» śviedčyć pra adekvatnuju reakcyju dziaržaŭnych struktur na hety pratest. Značycca z uładaj možna znajści parazumieńnie. Heta pakazvaje, što našy intaresy supadajuć. Čynoŭniki taksama ličać, što Krym de-jure zastajecca ŭkrainskim», — kamentuje navinu pra źniknieńnie z kniharniaŭ hlobusaŭ Ihar Barysaŭ.
«Ja nia viedaju, ci ŭ Biełarusi vyrablajuć hlobusy?, — praciahvaje partyjec. — Kali nie, to vyzvalajecca niša dla biełaruskich arhanizacyjaŭ, jakija mahli b zaniacca takoj vytvorčaściu».
Amal usie kniharni ŭ Mahilovie padparadkoŭvajucca akcyjanernamu tavarystvu «Mahiloŭsajuzdruk». U hetych kramach i prybrali z prodažu «pravakacyjnuju pradukcyju».
«A chto vam skazaŭ, što tyja hlobusy byli pravakacyjnaj pradukcyjaj», — adkazali žurnalistu ŭ adnoj z kniharniaŭ na jaho cikavaść nakont źniknieńnia hlobusaŭ ź vitryny i kramnych palic. Na tłumačeńnie naviednika, čamu hlobusy pravakacyjnyja, kramnicy nie adreahavali.
Što tyčycca kamercyjnych kramaŭ kancalarskich tavaraŭ, to na ichnych palicach hlobusy z «rasiejskim Krymam» vystaŭlenyja. Pradajucca takija hlobusy i ŭ najvialikšaj kramie horadu — ŭnivermahu. Mienavita na hetuju kramu i skardziŭsia Ihar Barysaŭ.
«Budziem pracavać z takimi kramami asobna. Raźniasiom ich kiraŭnictvu rekamendacyi Upraŭleńnia handlu i pasłuh Mahiloŭskaha abłvykankamu», — zaŭvažaje Ihar Barysaŭ.
«Hieneralnaja asambleja AAN pryniała rezalucyju 68/262, jakaja padtrymlivaje terytaryjalnuju cełasnaść Ukrainy ŭ jaje mižnarodna pryznanych miežach i jakaja nie pryznaje źmianieńniaŭ statusu Aŭtanomnaj Respubliki Krym i horada Sievastopala pa vynikach praviedzienaha 16 sakavika 2014 hodu ahulnakrymskaha referendumu», — havaryłasia ŭ adkazie Barysavu ź dziaržaŭnaj struktury abłasnoj vykanaŭčaj ułady.
Hlobusy z «rasiejskim Krymam», vyrablenyja polskaj firmaj «ZACHEM-GŁOWALA». Dyrektar firmy Kšyštaf Hłavała na zapyt Svabody adkazvaŭ, što jaho arhanizacyja nie padtrymlivaje «aneksii Kryma Rasiejaj». Pry hetym, jon pryznaŭ: kab nie hublać rasiejski rynak firma vymušanaja była paznačać Krym častkaj Rasiei. Takim było patrabavańnie rasiejskich partneraŭ, davodziŭ Svabodzie Kšyštaf Hłavała.
Kamientary