 |
Tym, chto ź niejkich pryčynaŭ nia zdoleje trapić na hetuju imprezu pieršaja prafesijnaja radyjostancyja bajnetu Netradio pry padtrymcy TH rychtuje niemałuju pryjemnaść — žyvuju tranślacyju hetaha kancertu na svaim kanale Netradio Live. A ŭžo 21 traŭnia na inšym kanale — Netradio Hot ciaham cełaj hadziny z 23:00 buduć hučać vyklučna pieśni N.R.M.
Vialiki akustyčny kancert hurta N.R.M. maje adbycca 29 traŭnia ŭ KZ «Minsk» u 19:00. Z hetaha ž času pačniecca jaho žyvaja tranślacyja na Netradio.by.
«My vielmi zacikaŭlenyja ŭ tranślacyi žyvych kancertaŭ našych rok‑zorak, — tłumačyć kiraŭnik hetaha prajektu Hleb Marozaŭ. — Tamu zrazumieła, što nie mahli abyści ŭvahaju hetuju cikavuju imprezu».
Netradio mieła tranślavać 26 traŭnia i cikavy folk‑fest «World Music Tree» ź Viciebsku. Ale adny ź jaho ŭdzielnikaŭ — hurt «Troica» — vystupili suprać on‑łajnu.
«My majem nia vielmi stanoŭčy dośvied padobnych tranślacyjaŭ u Polščy, tamu ličym, što da takoj padziei treba rychtavacca admysłova i hruntoŭna», — patłumačyli TH svaju admovu ŭdzielniki etna‑tryjo.
Što da N.R.M., to muzyki z radaściu pahadzilisia na žyvuju tranślacyju z KZ «Minsk». «Čym bolej nas pačujuć, tym lepiej», — kažuć muzyki.
Tym časam užo 21 traŭnia na kanale Netradio Hot ciaham hadziny — z 23:00 da 0:00 — u miežach aŭtarskaj prahramy Siarhieja Budkina «Biełaruskaja raskładka» buduć hučać vyklučna tvory hurta Lavona Volskaha — hałoŭnyja hity, rarytetnyja zapisy, ichnija kavery dy kavery na ich.
