Kali ŭvažliva sačyć za navinami paśla teraktaŭ i katastrof, možna zaŭvažyć, što ŭ śpisach zahinułych, jakija składajuć ŚMI, časta źjaŭlajecca adzin i toj ža čałaviek.
Fota hetaha mužčyny trapiła ŭ tym liku i ŭ rolik The New York Times, pryśviečany zabitym u hiej-kłubie ŭ Arłanda. Supracoŭniki francuzskaha telekanała France 24 znajšli «viečnuju achviaru» i vyśvietlili, čamu jaho fota rehularna ŭspłyvaje ŭ navinach.
Apošnim časam paśla kožnaha bujnoha teraktu abo avijakatastrofy ŭ sacsietkach i ŚMI źjaŭlajecca zdymak adnaho i taho ž mužčyny, jaki nibyta pamior na miescy zdareńnia. Ad pačatku 2016 hoda jon «zahinuŭ» pry terakcie ŭ aeraporcie Stambuła, pry krušeńni samalota EgyptAir i byŭ zabity ŭ hiej-kłubie ŭ Arłanda, dzie isłamist zastreliŭ 49 čałaviek. Akramia taho, kali ŭ Mieksicy 19 červienia zabili niekalki demanstrantaŭ, mienavita jaho nazvali pradstaŭnikom ułady, jaki addaŭ zahad adkryć ahoń.
@10uru01 #Help my brother Alfonso was on #Atatürk Airport and we dont know anything about him, help please #Turkey https://t.co/Q6eeRv4nj8
«Bi-Bi-Si» vyśvietliła, što heta fejk jašče ŭ mai 2016 hoda. Paśla taho, jak pasažyrski samalot EgyptAir zvaliŭsia ŭ Mižziemnaje mora, avijakampanija napisała tvit pra katastrofu. U adkaz na jaho niechta napisaŭ, što siarod pasažyraŭ byŭ mužčyna z fatahrafii. Aŭtar paviedamleńnia nazvaŭ jaho «bratam Alfonsa». «Bi-Bi-Si» zasumniavałasia ŭ sapraŭdnaści zdymka i praviała nievialikaje rasśledavańnie. Vyśvietliłasia, što «brat Alfonsa» ŭžo źjaŭlaŭsia raniej u internecie — u tym liku ŭ suviazi ź niejkaj bojkaj ŭ mieksikanskim handlovym centry. Tady žurnalisty «Bi-Bi-Si» nie zmahli daviedacca, navošta niechta apublikavaŭ staruju fatahrafiju.
U lipieni francuzskamu telekanału France 24 atrymałasia razabracca, chto na fota i čamu jaho tvar uvieś čas źjaŭlajecca ŭ navinach paśla hučnych padziej. Žurnalisty źviarnulisia da karystalnikaŭ, jakija publikavali zdymak. Usie jany raspaviali padobnuju historyju: čałaviek z fatahrafii apynuŭsia daŭžnikom, jaki nie viartaje hrošy.
«Naša meta — razburyć jaho reputacyju. My chočam, kab uvieś śviet viedaŭ jaho ŭ tvar», — raspavioŭ adzin ź ich.
Francuzskija žurnalisty znajšli i samu «achviaru», ale vyrašyli nie raskryvać imia mužčyny. Jon raspavioŭ, što sapraŭdy vinny niekalkim ludziam. I vykazaŭ mierkavańnie, što takim čynam jamu pomściać. Pavodle jaho słoŭ, jon źviartaŭsia ŭ ŚMI z prośbaj vydalić zdymak, ale nie atrymaŭ adkazu.
Paśla publikacyi France 24 haziecie The New York Times daviałosia vydalić fatahrafiju mužčyny z rolika, u jakim jon zhadvaŭsia jak achviara teraktu ŭ hiej-kłubie ŭ Arłanda.
Chto z palitviaźniaŭ vyjšaŭ na svabodu 16 vieraśnia POŬNY ŚPIS23
Kamientary