Partuhalija na čale z Kryšcijanu Ranałdu pieramahła Uels i vyjšła ŭ finał Jeŭra
Zbornaja Partuhalii stała pieršym finalistam Jeŭra-2016, jaki prachodzić u Francyi. U paŭfinale «čyrvona-zialonyja» pieramahli siensacyjny Uels – 2:0.
Partuhalija – heta svojeasablivy fienomien Jeŭra. Da siońniašniaha dnia jany nie atrymali nivodnaj pieramohi ŭ asnoŭny čas. Try ničyi na hrupavoj stadyi, pieramoha ŭ dadatkovy čas nad Charvatyjaj, šancavańnie ŭ sieryi pienalci z Polščaj. I tym nie mienš, pieramožcaŭ nie sudziać.
Pieršy tajm prajšoŭ pry vielmi roŭnaj hulni. Časam navat mahło zdacca, što heta paŭtareńnie hulni Partuhalija – Charvatyja biez udaraŭ u stvor varot. Ale nie, lidar valijcaŭ Haret Bejł adnojčy trapiŭ u ramku. Bejł uvieś pieršy tajm ciahnuŭ za saboj «cmokaŭ», časam brytanskaja kamanda vyhladała navat bolš pryvabna. Zrešty, da realnaj niebiaśpieki sprava nie dachodziła.
U druhim tajmie svajo važkaje słova skazaŭ adzin z najlepšych futbalistaŭ sučasnaści Kryštyjanu Ranałdu. Jon absalutna ŭ kłasičnym dla siabie styli skoknuŭ pry padačy miača ŭ štrafnuju i znoŭ na imhnieńnie pieravisieŭ supiernikaŭ i dakładna hałavoj nakiravaŭ miač u sietku. Kryštyjanu skočyć u vyšyniu i trymajecca ŭ pavietry navat lepš za mnohich zorak NBA. Heta treci hoł Kryštyjanu na čempijanacie.
Litaralna praz try chviliny valijcaŭ adpravili ŭ vielmi ciažki nakdaŭn. Heta Nani adhuknuŭsia na pas Kryštyjanu Ranałdu. Afsajda nie było i šviedski arbitr Eryksan vielmi hramatna razabraŭsia ŭ situacyi – 2:0.
Paśla hetaha hulnia pastupova pierajšła ŭ stan dahulvańnia. Partuhalcy mieli našmat bolej šancaŭ, kab zrabić lik bujnym, čym valijcy, kab zraŭniać ličby.
Zbornaja Uelsa zhulała našmat lepiej, čym chtości ad jaje čakaŭ na hetym Jeŭra. Partuhalcy ž zaŭtra daviedajucca svajho supiernika pa finale. Heta buduć, ci niemcy, ci francuzy. Hulnia pačniecca a 22:00.
Ciapier čytajuć
Dačka deputata z Ašmian trapiła na dziaržsłužbu. Dla hetaha jana kinuła nieŭjaznoha chłopca3
Kamientary