Vyrašalny hoł u finale Jeŭra-2016 zabiŭ partuhalski napadnik Eder. Kali być dakładnym — Ederzitu Antoniu Mašedu Łopiš.
Niama sumnievaŭ, što noč z 10 na 11 lipienia 2016 hoda — jahony hałoŭny momant słavy ŭ žyćci.
«Naša Niva» raskazvaje pra kručasty los Edera.
Emihrant z Hvinieja-Bisau
Chłopiec naradziŭsia ŭ 1987 hodzie ŭ horadzie Bisaŭ, heta stalica Hvinieja-Bisau, adnoj z najbiadniejšych krain śvietu.
Chvilinka statystyki.
Pavodle padlikaŭ AAN, siaredniaja praciahłaść žyćcia ŭ krainie składaje kala 55 hadoŭ (uvachodzić u top-10 najhoršych pakazčykaŭ).
Dźvie traciny nasielnictva žyvie za miažoj biednaści. Budaŭnictva sacyjalizmu ŭ 1970—1980-ja nie dała nijakaha plonu. Ekanomiki ŭ Hviniei-Bisau niama, lehalny dachod daje tolki niaznačny ekspart ryby i areškaŭ.
Turysty da hetaha miesca nie dabirajucca, bo za apošniaje dziesiacihodździe Hvinieja-Bisau pieratvaryłasia ŭ sapraŭdnuju narkatyčnuju dziaržavu. Praź jaje prakačvajucca tony kakainu, jaki pieravozicca z Paŭdniovaj Amieryki ŭ Jeŭropu.
Hvinieja-Bisau zdabyła niezaležnaść tolki ŭ 1974 hodzie, a raniej była kałonijaj Partuhalii.
Tamu nie dziva, što paśla čarhovaha kryzisu na radzimie baćki Edera pasprabavali znajści lepšaje žyćcio mienavita ŭ Partuhalii.
Siamja asieła ŭ akruzie Kaimbra, heta centralnaja Partuhalija. A Eder staŭ zajmacca futbołam.
Nie samy pierśpiektyŭny
Vysačeznaha chłopca (ciapier jahony rost — 190 sm) adpravili ŭ ataku, i na junackim uzroŭni hulnia ŭ napadzieńni ŭ jaho atrymlivałasia.
Praŭda, supierpierśpiektyŭnym Eder nie byŭ nikoli — u vyšejšaj lizie čempijanata Partuhalii debiutavaŭ tolki ŭ 21 hod, dyj i tam zaźziaŭ nie adrazu — spačatku byŭ tolki adzin hoł za 30 matčaŭ.
Za siem hadoŭ hulni ŭ «Akademicy Kaimbry» i «Brazie» jon nazabivaŭ 50 hałoŭ i paśpieŭ debiutavać u zbornaj Partuhalii.
Adna z paśpiachovych biznes-schiem partuhalskich futbolnych kłubaŭ — vyhadavać hulca i pradać jaho za dobryja hrošy ŭ inšyja jeŭrapiejskija kłuby.
Letaś Eder pryhlanuŭsia valijskamu «Suonsi», jaki vystupaje ŭ čempijanacie Anhlii. Za 13 matčaŭ jon nie zabiŭ nivodnaha hoła!
Schapiŭšysia za hałavu, haspadary kłuba chucieńka zbyli jaho ŭ francuzski «Lil», dzie Eder, pa ščyraści, raskvitnieŭ, zabiŭšy 6 hałoŭ.
Žalezny reziervist
U zbornaj Partuhalii ad pačatku 2010-ch nie było ŭciamnaha napadajučaha, adnak u im nie było pilnaj patreby. Univiersalny Kryšcijanu Ranałdu kłaŭ u varoty supiernika hoł za hołam, a Eder tolki čas ad času vychodziŭ na pole.
Da pačatku hetaha hoda ŭ jaho była katastrafičnaja statystyka ŭ zbornaj — 1 hoł za 21 hulniu!
Na Jeŭra-2016 jon jechaŭ žaleznym futbalistam zapasu. Ederu ŭdałosia vyjści na paru chvilin u matčach ź Isłandyjaj i Aŭstryjaj. Dobra kali jon paśpieŭ choć dakranucca da miača.
A voś u finale traŭma Kryšcijanu Ranałdu prymusiła treniera partuhalcaŭ uzmacniać ataku. Pakolki napadajučy ŭ zapasie byŭ tolki adzin, Eder atrymaŭ čas prajavić siabie. Vyjšła — lepš nie prydumaješ. Svaim hołam na 117-j chvilinie futbalist prynios svajoj novaj radzimie pieramohu na čempijanacie Jeŭropy.
![Клас Клас](https://nashaniva.com/images/reactions/reaction-like.png)
![Панылы сорам Панылы сорам](https://nashaniva.com/images/reactions/reaction-facepalm.png)
![Ха-ха Ха-ха](https://nashaniva.com/images/reactions/reaction-smile.png)
![Ого Ого](https://nashaniva.com/images/reactions/reaction-omg.png)
![Сумна Сумна](https://nashaniva.com/images/reactions/reaction-sad.png)
![Абуральна Абуральна](https://nashaniva.com/images/reactions/reaction-anger.png)