Vyniki samitu: NATO znoŭ stała sapraŭdnym vajennym sajuzam
Aljans hatovy abaraniać siabie j dapamahać susiedziam – Hruzii dy Ŭkrainie.
Raźmiaščeńnia čatyroch bataljonaŭ NATO va ŭschodnich krainach Aljansu, dapamoha Ukrainie, Hruzii i Afhanistanu, a taksama pačatak specaperacyjaŭ u Iraku i Mižziemnym mory – takimi byli asnoŭnyja vyniki samitu NATO, jaki zaviaršyŭsia ŭ subotu ŭ Varšavie. Vyniki sustrečy palitykaŭ i vajskoŭcaŭ Paŭnočnaatlantyčnaha aljansu padsumoŭvaje Alaksandar Papko.
Palityki, vajskoŭcy i eksperty z 28 krainaŭ-siabraŭ NATO i 26 krainaŭ-partneraŭ sabralisia ŭ Varšavie, kab dać adkaz na pahrozy, jakija iduć z uschodniaha i paŭdniovaha nakirunku. Adnym z hałoŭnych rašeńniaŭ stała pastanova raźmiaścić 4 šmatnacyjanalnyja bataljony ŭ Polščy, Łatvii, Letuvie dy Estonii. Užo viadoma, što praz paŭhoda ŭ Polšču pryjeduć žaŭniery z ZŠA, Brytanii j Rumynii.
Aljans raźmieścić 4 tysiačaŭ vajskoŭcaŭ na svaich uschodnich miežach u adkaz na aneksiju Krymu Rasiejaj i raspalvańnie vajny ŭ Danbasie. Zrazumieła, 4 bataljony nia mohuć dać adpor rasiejskim dyvizijam. Ich rola chutčej palityčnaja. Mižnarodnaja prysutnaść pavinna utrymać Rasieju ad luboj ahresii suprać krainaŭ Bałtyi i Polščy, bo heta stanie ahresijaj suprać usiaho NATO – tłumačyć dyrektar Polskaha instytutu mižnarodnych spravaŭ Słavamir Dembski.
S. Dembski: Aljans budzie ŭtrymlivać hetyja siły ŭ bałtyjskich krainach tak doŭha, jak doŭha buduć akupavanyja Krym i Danbas. My dajem zrazumieć, što Rasiei treba źmianicca. Kali jana nia źmienicca, kali jaje palityka budzie pahražać miru ŭ Eŭropie, to NATO budzie vymušany prymać nastupnyja kroki. Isnuje perspektyva ŭzmacnieńnia hetych siłaŭ, kali Rasieja nia źmienić svajoj palityki.
Krainy Aljansu vyrašyli dapamahčy dziaržavam, jakija paciarpieli ad ahresii Rasiei. Z Hruzijaj była padpisanaja damova ab dapamozie ŭ pabudovie systemy supraćpavietranaj abarony i pavietranaj vyviedki. Jašče bolš šyrokuju damovu Aljans padpisaŭ z Ukrainaj.
NATO akaža Kijevu ekspertnuju i finansavuju dapamohu ŭ 40 sferach, siarod jakich – madernizacyja ŭzbrojenych siłaŭ, abaronnaj pramysłovaści i ŭzmacnieńnie ŭnutranaj biaśpieki. Kolkaść vajskovych daradcaŭ Aljansu va Ŭkrainie budzie pavialičana. Akramia hetaha, damovu ab vajskovym supracoŭnictvie Ukraina zaklučyła z Polščaj. Dakument praduhledžvaje pastaŭki va Ŭkrainu polskaj vajskovaj techniki dy ŭzbrajeńnia – adnak vyklučna abaronnaha charaktaru.
Nichto z analitykaŭ nie spadziavaŭsia, što Ukrainu j Hruziju na samicie aficyjna zaprosiać dałučycca da NATO. Adnak, kiraŭnictva NATO padkreśliła, što dźviery Aljansu adčynienyja dla novych siabraŭ.
S. Dembski: Ukraina moža być zadavolenaja rašeńniem Varšaŭskaha samitu. Jana atrymała najbolš ščodry pakiet dapamohi dla svaich Uzbrojenych siłaŭ. Hruzija – taksama. Paŭnočnaatlantyčny aljans užo ŭśviedamlaje, što ŭ jaho jość sapraŭdnyja sajuźniki, jakija nie źjaŭlajucca siabrami NATO. Aljans zachoŭvaje palityku «adčynienych dźviarej». I dla Hruzii, i dla Ŭkrainy perspektyva siabroŭstva ŭ NATO zastajecca adkrytaj.
Niekatoryja čakali ad NATO rašučych dziejańniaŭ pa spynieńni kryvavaha kanfliktu ŭ Siryi. Adnak krainy Aljansu nie pažadali vysyłać žaŭnieraŭ u chaos etničnaj i relihijnaj vajny.
S. Dembski: U Siryi my majem spravu ź idealohijaj, jakaja zmahajecca z demakratyjaj, hrajučy na antyamerykanskich nastrojach i abureńni ludziej ich elitami. Siłaj adkazać na idealohiju niemahčyma. Pieramahčy jaje možna dobrym prykładam, a na heta patrebny čas. Demakratyčnyja dziaržavy mohuć vykarystoŭvać siłu, kab abmiežavać ekspansiju tak zvanaj Isłamskaj dziaržavy – adnak tolki ŭ abmiežavanym maštabie. Pry hetym krainy NATO hatovyja ŭmacoŭvać abaronazdolnaść Iraku j pravodzić bolš aktyŭnuju palityku.
Na samicie ŭ Varšavie krainy NATO pastanavili, što kaalicyi, jakaja zmahajecca z terarystami Isłamskaj dziaržavy, daduć u rasparadžeńnie samaloty vyviedki AWACS. Aljans budzie treniravać aficeraŭ armii Iraku, a karabli NATO pačnuć patrulavać uźbiarežža Livii. Akramia hetaha, dziaržavy Paŭnočnaatlantyčnaha aljansu pahadzilisia finansavać i treniravać armiju Afhanistanu da 2020 hodu.
Siarod važnych pastanovaŭ Varšaŭskaha samiu NATO naležyć uzhadać i ŭzmacnieńnie kiberbiaśpieki. Kiberprastora była pryznanaja adnym z teatraŭ viadzieńnia vajennych dziejańniaŭ – naroŭni z pavietram, sušaj i moram. Ataka suprać kamputernych systemaŭ adnoj krainy ciapier pryznajecca ahresijaj suprać usiaho NATO. Zaniacca abaronaj u Internecie Aljans prymusiła Rasieja – tłumačyć vice-prezydent vašynhtonskaha Centru stratehičnych i mižnarodnych daśledavańniaŭ Chezer Konli.
Ch. Konli: Elektronnyja srodki vielmi mocna ŭpłyvajuć na viadzieńnie vajny. Padčas vajennych dziejańniaŭ va Ŭkrainie Rasieja vielmi efektyŭna vykarystoŭvała kiberataki dy elektronnuju vyviedku. NATO vyvučyła hetyja ŭroki j dabaviła ich u svaju daktrynu.
Samit u Varšavie pakazaŭ, što NATO ciapier našmat bolš salidarnaja i rašučaja arhanizacyja, čym taja, jakuju my mieli jašče paru hadoŭ tamu – ličyć były ambasadar ZŠA ŭ Rasiei, a ciapier – namieśnik hieneralnaha sakratara NATO Alaksandar Veršboŭ.
A. Veršboŭ: Hety samit prademanstravaŭ adzinstva Aljansu ŭ adnosinach da Rasiei, salidarnaść z Ukrainaj, a taksama žadańnie dać srodki na supolnyja dziejańni. Ciažej za ŭsio damahčysia vydzialeńnia resursaŭ. Adnak my narešcie pačynajem heta rabić.
Jašče niadaŭna ŭdzielniki NATO značna razychodzilisia ŭ pohladach na ŭłasnuju i mižnarodnuju biaśpieku. Doŭhija hady Aljans byŭ zaniaty prablemaj Afhanistanu j spračaŭsia z Rasiejaj vakoł pabudovy supraćrakietnaha ščyta dy pryniaćcia ŭ svaje šerahi novych siabraŭ. Pry hetym žadańnie starych siabraŭ NATO vydatkoŭvać hrošy na abaronu niaŭchilna źmianšałasia. Ŭsiaho za dva hady z amorfnaha palityčnaha klubu NATO znoŭ pieratvaryłasia ŭ abaronny sajuz. Aljans viedaje, dziela čaho isnuje, uśviedamlaje pahrozy i, zdajecca, usio bolš viedaje, što z hetymi pahrozami rabić.
Kamientary