Maładafrontaŭca Artura Finkieviča sudziać za naniasieńnie bujnoj škody dziaržaŭnaj majomaści – jon nakremzaŭ na ścianie «My chočam novaha!». Spadar hienprakuror, Finkievič – zialony amatar. Na jaho miescy pavinien być ja. Feljeton Lolika Uškina.
Usia maja bijahrafija – bieskancovy kanvejer deliktaŭ suprać dziaržavy, za jakija ja nie panios anijakaj adkaznaści.
Miarkuju, što na šlach złačynnaści ja staŭ va ŭzroście 11–12 hadoŭ. Abjektam pieršych kryminalnych zabavaŭ stała šylda ŭ padjeździe «Dvieri nie zakryvať». Zafarbavaŭšy litaru «k» u słovie «zakryvať», ja ŭ natury prykałoŭsia.
Adnak dziaržavie było vidavočna nie da prykołaŭ. Adpaviedna dakumentam prakuratury finkievičaŭskija «My chočam novaha!» kaštavali biełaruskamu Lefijavanu amal piatnaryk tysiač baksaŭ. Možna padličyć, što adna litara hrafici abychodzicca padatkapłatnikam pryblizna ŭ 1200 «zialonych».
Takim čynam, zakreśliŭšy litaru, ja ablehčyŭ biudžet tady jašče BSSR na 1200 u.a.. Adnak samaje strašnaje – ja atrymaŭ pačućcio tatalnaj ŭsiodazvolenaści.
Nastupny delikt byŭ kudy bolš surjozny. Pryblizna ŭ 1985 h. u maim rodnym Salihorsku pačałasia rajonnaja vendeta: našamu błoku «Kitajka» abviaścili vajnu adnahodki z kvartałaŭ «Dvojka» i «Parkavaja». Vest-sajdzkaja historyja pa-salihorsku nie abmiežavałasia banalnymi machačami. Paralelna išła bojka hrafici. My, kažučy słenham repieraŭ, «bambili» ścieny tezisami kštałtu «Dvojka – karali unitazu» i «Kitajka – karali».
Ja «pamieciŭ» zhadanymi nadpisami miascovaść razoŭ dziesiać. Kali padličyć, što ŭ kožnym vyrazie pryblizna 15 artahrafičnych adzinak, arytmetyka naniesienaj dziaržavie škody prosta žachlivaja: 15 ch 10 ch 1200 = 1800000 u.a.
U chutkim časie salihorskija Manteki i Kapuleci zrazumieli, što atrymać armaturaj pa čajniku z-za niuansaŭ prapiski – dziacinstva. My abrali sabie bolš składanyja identyfikacyjnyja kody – «kitajcy» abviaścili siabie prychilnikami «Iron Maiden» – stali «metaluhami», a našy apaniety padsieli na «Modern Talking» i inšych vykanaŭcaŭ-»vałnistaŭ». Adpaviedna my padkarektavali i našu vizualnuju prapahandu. «Lepš uziać u n.hra ŭ r.t, čym pasłuchać Depeshie Mode» ( 40 litaraŭ). Takim ślohanam ja jak najmienš piać razoŭ prykrasiŭ mury rodnaha horadu. Nastupstvy – Minžyłhaspadarki nie daličyŭsia – 40 ch 5 ch 1200 = 240000 dalaraŭ ZŠA. Dobra, što pavalnaja moda na metał chutka syjšła.
Miž tym, aŭtar tekstu nie pakinuŭ śviet kryminału, staŭšy fanatam mienskaha «Dynama», a paśla kałapsu Saŭka – rodnaha «Šachciora». Hrafičnaje pryznańnie ŭ kachańni da futbolnych kalektyvaŭ – u adroźnieńnie ad muzyčnych – nie pieraduhležvaje bolš za 12–15 litaraŭ. Naprykład, «Šachcior – čempijon»!. Adnak usio roŭna pryblizna 50 hrafici, zroblenych za žyćcio, kankretna padkasili fond dziaržmajomaści: 12 ch 50 ch 1200 = 720000 u.a.
Ciapier statystyčnaje reziumie škody, jakuju ja nanios dziaržavie: 1200 + 1800000 + 240000 + 720000 = 2764000 u.a.
I heta ž biez uliku faktyčnaj saŭdzielnaści ŭ jašče adnym bujnym zamachu na majomaść RB.
U 2001 ja byŭ śviedkam akcyi łukamoła. Prychilniki režymu malavali na płocie kala salihorskaha vakzału frazy «My za baćku!». Zamiest taho, kab, jak śviadomy hramadzianin, dać adpaviedny syhnał orhanam, ja tupa łybiŭsia na hrafitčykaŭ, piŭ piva i prosta kruciŭ palcam kala skroni.
Vyvad: sp.hienprakuror, adpuścicie «zialonaha» Finkieviča i zajmiciesia sapraŭdnymi złačyncami kštałtu mianie. Čakaju paviestki.
Lolik Uškin
