«Sapraŭdnyja desantniki siońnia ćviarozyja, a pituščyja adrazu zdaducca ŭ pałon». Dzień PDV-2016 u Minsku
Tradycyjna 2 žniŭnia adznačajuć Dzień desantnikaŭ i sił śpiecyjalnych apieracyj. Sioleta vajskovaje śviata ŭ horadzie prachodziła dastatkova cicha i mirna. Biezumoŭna, heta źviazana jašče i z tym, što śviata PDV prypała na budni dzień.
Dastatkova šmat desantnikaŭ admovilisia ad užyvańnia ałkaholu ŭ hety dzień. Pry hetym tyja, što ŭžyvali ałkahol, ni da kaho nie čaplalisia, nie kanfliktavali i redka dazvalali sabie kryknuć «Dzień PDV!».
Mužyki va ŭzroście, da jakich my padyšli, ličać, što tyja, chto pje i kidajecca ŭ fantany, nie sapraŭdnyja desantniki. «Voś jany napivajucca tut, chodziać, a kali raptam što budzie — adrazu zdaducca ŭ pałon».
Milicyja pa-roznamu staviłasia da śviatkavańnia desantnikaŭ u hetym hodzie. Adny milicyjanty ŭcichuju prapanoŭvali źniać žurnalistam «NN» niećviarozych śviatkujučych, inšyja sprabavali ich kantralavać, hańbiačy ich za pavodziny i zabaraniajučy im śpiavać, trecija chavalisia ŭbaku, čaćviortyja sprabavali niejak damovicca. Apošnich było bolš.
Voś i dvoje chłopčykaŭ chodziać i šukajuć desantnikaŭ, kab ich pavinšavać. Adzin navat formu admysłovuju apranuŭ.
U kožnym natoŭpie, da jakoha my padychodzili, možna było znajści chłopca, jaki razvažaŭ pra Biełaruś, źniešnija pahrozy i biełaruskuju movu.
Voś chłopiec Roma, jaki słužyŭ u Marjinaj Horcy, vyrašyŭ padzialicca svajoj karcinaj śvietu siońnia: «Ja pa adukacyi budaŭnik. U škole ŭ mianie było kiepska z matematykaj, ale pa biełaruskaj movie i litaratury stajała vosiem. Ja pajšoŭ u śpiecnaz, bo lublu svaju Radzimu i hatovy jaje abaraniać. Mnie kryŭdna, što voś takija, — jon pakazaŭ na moładź, jakaja na Niamizie zvyčajna hulaje ŭ valejboł, — abyjakava staviacca da našaj krainy. A kali raptam na nas napadzie taja ž Rasija — jany ž źbiahuć. Toje samaje datyčycca i niekatorych desantnikaŭ. Tyja, chto kupajecca ŭ fantanach i napivajecca — vedevešniki, a nie desantniki».
Padčas našaj hutarki vedevešniki ŭsio ž załaziać u fantan i pačynajuć kryčać: «Słava VDV! Słava hierojam!». Supracoŭniki AMAP pobač nazirajuć za hetym. Inšyja ŭstrymalisia ad kupańnia ŭ fantanie i pajšli hulać u valejboł z padletkami.
Paśla doŭhaj razmovy da Romy padychodzić kaleha pa słužbie, i pamiž imi adbyvajecca taki dyjałoh: « — Nu što, jak ty? — Pracuju. — Va Ukrainu nie źbiraješsia? — Nie».
Ciapier čytajuć
Pieršaha namieśnika hiendyrektara «Biełviesta» pasadzili na try z pałovaj hady za palityku6
Pieršaha namieśnika hiendyrektara «Biełviesta» pasadzili na try z pałovaj hady za palityku
«Ja nie śviataja, ale ŭ mianie nie było nadziejnaha plača pobač»: maci Ksiušy z SMA mohuć pazbavić baćkoŭskich pravoŭ, jana ž davodzić, što zdolnaja vypravicca1717
Kamientary