Usie jamu raili zaviazvać: piać faktaŭ pra alimpijskaha miedalista Vadzima Stralcova

Pakručasty los srebranaha pryziora Alimpijady Vadzima Stralcova ŭ karotkim pierakazie «NN».

Druhoje miesca ŭ ciažkaj atletycy ŭ vahavaj katehoryi da 94 kiłahramaŭ zaniaŭ biełarus Vadzim Stralcoŭ. Macniejšym za jaho byŭ tolki Machrab Maradzi.

Rodam z Kaściukovickaha rajona

Pavialičyć

Vadzimu Stralcovu 30 hadoŭ. U jahonaj prafiesijnaj karjery było roznaje — i jaskravyja ŭźloty, i krutyja padzieńni. Ale na hetuju Alimpijadu praz roznyja pryčyny Stralcoŭ jechaŭ jak biezumoŭny favaryt. Ad jaho nie prosta čakali miedala, a ŭznaharody najvyšejšaj proby.

Navat u aficyjnych bijahrafijach paŭsiul pišacca, što Vadzim Stralcoŭ — z Mahilova. Jon sapraŭdy žyvie ŭ hetym abłasnym horadzie. Adnak rodam spartsmien ź vioski Haŭrylinka Kaściukovickaha rajona. Kali chłopcu było trynaccać hadoŭ, to fizruk advioz jaho da kaściukovickich trenieraŭ, a ŭžo tyja pieranakiravali pacana ŭ Mahiloŭ.

Da ciažkaj atletyki Vadzim zajmaŭsia bieham, jaho karonnaj dystancyjaj było 1000 mietraŭ. «Nie skažu, što byŭ mocnym u toj čas, ale dakładna nie słabym», — kazaŭ Stralcoŭ.

Pravał na Alimpijadzie ŭ Piekinie

Pavialičyć

Pieršy raz zołata na suśvietnych spabornictvach Stralcoŭ zavajavaŭ roŭna dziesiać hadoŭ tamu — u 2006 hodzie na junijorskim pieršynstvie ŭ kitajskim Huančžoŭ. Paśla była bronza na darosłych spabornictvach u Čyanhmai. Na Alimpijadzie-2008 ad Stralcova čakali miedal. Ale na Hulni jon pajechaŭ zusim chvory, zmučali traŭmy, ale nie jechać nie moh, bo atrymaŭ by štrafnyja sankcyi. U vyniku jon navat nie zmoh padniać štanhu. Pravał.

Paśla hetaha karjera Stralcova pajšła pad adchon. Na suśvietnych čempijonatach jon zajmaŭ miescy nižej za dziasiataha. Ničoha dobraha na haryzoncie nie pradbačyłasia. Ale mahiloviec uziaŭ siabie ŭ ruki i pierazapuściŭ karjeru. Letaś u Chjustanie jon upieršyniu staŭ čempijonam śvietu, padniaŭšy vielmi ŭnušalnyja 405 kiłahramaŭ. Na ŭručeńni miedaloŭ Stralcoŭ vyjšaŭ u kaŭbojskim kapielušy. Heta ž Techas jak-nijak.

Adznačym, što spartoviec ni razu nie byŭ zaŭvažany ŭ dopinhu — redkaść dla ciažkaatletaŭ.

Nastojvali, kab zaviaršyŭ karjeru

Pavialičyć

Paśla «baranki» na Alimpijadzie ŭ Piekinie ŭ Vadzima Stralcova źjaŭlalisia dumki ŭvohule zaviazać sa sportam. Raiŭ heta ŭ tym liku navat rodny baćka. Dyj nie treniery nie vyznačalisia asablivaj dalikatnaściu. Naprykład, nastaŭnik zbornaj Alaksandr Hančaroŭ prapanavaŭ: «Ty padumaj, moža, užo kančaj». Stralcoŭ kaža, što Hančaroŭ nastojvaŭ, kab inšyja treniery nikudy nie brali atleta. Adnak znajšoŭsia Šaršukoŭ, jaki paličyŭ, što stavić kryž na Stralcovu rana. Układvaŭ u jaho svaje hrošy, i heta dała plon.

Zrešty, Hančaroŭ kaža, što vaziŭsia sa Stralcovym bolš čym chto. «U jaho składany charaktar. Paśla taho, jak jamu prezidenckuju stypiendyju dali, jak tolki ni kuralesiŭ — niaprosty byŭ čas», — kazaŭ trenier Hančaroŭ.

Umieje ŭsio rabić svaimi rukami

Pavialičyć

U rodnaj vioscy Vadzima Stralcova Haŭrylincy ŭsio jašče žyvie jahonaja babula Śviatłana, maci baćki. Jana adna z najbolš addanych fanataŭ unuka, hladzić spabornictvy, pieršaj vinšuje.

«Jaho baćki raźvialisia, kali Vadzim vučyŭsia ŭ Mahilovie, — kaža spadarynia Śviatłana. — Chto jaho tolki ni krytykavaŭ, adnak jon skazaŭ, što dasiahnie pośpiechu, i dasiahnuŭ!»

Babula kaža, što ŭnuk zaŭsiody pracu rabiŭ u asałodu: i bulbu vykapać, i dvor abkasić. «My ž ludzi ad sachi, sami razumiejecie», — kaža jana.

Nie vystaŭlaje pryvatnaha žyćcia napakaz

Pavialičyć

Vadzim Stralcoŭ skončyŭ fakultet fizičnaha vychavańnia Mahiloŭskaha dziaržaŭnaha ŭniviersiteta imia Kulašova. Sioleta ŭ krasaviku jaho nazvali adnym ź ludziej hoda Mahilova.

Vadzim Stralcoŭ žanaty i haduje dačku. Ale svajo pryvatnaje žyćcio ciažkaatlet nie vystaŭlaje na pakaz.

• 0
• 0
• 0
• 0
• 0
• 0
• 0
• 0