Hubiernatar Vałhahradskaj vobłaści RF Andrej Bačaroŭ uchvaliŭ prapanovu nadać rekanstrujavanamu mižnarodnamu aeraporctu Vałhahrada nazvu Stalinhrad, havorycca ŭ paviedamleńni na sajcie administracyi rehijonu.
ria.ru
Z prapanovaj prymierkavać pierajmienavańnie da 75-j hadaviny zaviaršeńnia Stalinhradskaj bitvy vystupili pradstaŭniki vieteranskich arhanizacyj.
«Heta było b dobrym znakam patryjatyčnaha vychavańnia, znakam dla moładzi, što my šanujem zavajovy i podźvih našych baćkoŭ i dziadoŭ, jakija adstajali Stalinhrad», — skazaŭ staršynia Vałhahradskaha abłasnoha savieta vieteranaŭ Siarhiej Nazaraŭ.
U svaju čarhu namieśnik kiraŭnika vieteranskaha savieta Juryj Tarhašoŭ adznačyŭ, što, nadaŭšy aeraportu nazvu Stalinhrad, možna było b źniać pytańnie ab viartańni hetaha imia horadu Vałhahradu.
Hubiernatar prapanovu vieteranaŭ uchvaliŭ, adznačyŭšy ŭ toj ža čas, što pytańnie patrabuje prapracoŭki.
U 2014 hodzie prezident Rasii Uładzimir Pucin nie vyklučyŭ, što Vałhahradu paśla refierendumu moža być viernutaja histaryčnaja nazva. Z takoj prośbaj da kiraŭnika dziaržavy źviarnułasia hrupa vieteranaŭ. Adnak u lutym 2015 hoda Dziaržduma adchiliła prapanovu ab pierajmienavańni Vałhahrada ŭ Stalinhrad.
Zasnavany ŭ 1589 hodu horad nazyvaŭsia Carycyn. U 1925 hodzie jon byŭ pierajmienavany ŭ Stalinhrad. U 1961 hodzie ŭ ramkach baraćby z kultam asoby nasieleny punkt pierajmienavali ŭ Vałhahrad.
