Kamu ŭ Minsku žyć dobra? Top-10 samych bahatych kandydataŭ u deputaty
Na sajcie Minharvykankama źjaviłasia padrabiaznaja infarmacyja pra kandydataŭ u deputaty, uklučna ź ich dachodami za minuły hod.
Chto letaś zarablaŭ u stalicy lepš za ŭsich? Adznačym, što ŭ ahulny dachod mahli być uklučanyja hrošy, atrymanyja ad prodažu kvatery ci aŭtamabila. Adnak dla zručnaści my raździalili hadavy dachod na 12 — atrymaŭsia siaredniemiesiačny dachod.
1. Maksim Krupiejčanka. 443 miljony rubloŭ na miesiac = $27900
Kaśmičnyja ličby zafiksavanyja ŭ dekłaracyi biespartyjnaha dyrektara TAA «Mietałaptzbyt». Kampanija zajmajecca prodažam, rezkaj i dastaŭkaj mietałaprakatu.
2. Uładzimir Sinihajeŭ. 99 miljonaŭ rubloŭ na miesiac = $6300
Padobnyja abaroty i ŭ pradprymalnika, jaki vyłučajecca ad ŁDPB. Pakazalna, što pra jaho «Marlušu» nie viedaje navat «Huhł».
3. Valeryj Varaniecki. 88 miljonaŭ rubloŭ na miesiac = $7400
Siarod «biudžetnikaŭ» lidziruje ambasadar u Aŭstryi i Charvatyi. Jon atrymaŭ najlepšy dachod u zamiežnaj valucie — ahułam bolš za 56 tysiač jeŭra pasolskaha zarobku.
U parłamiencie Varaniecki budzie mieć našmat mienšyja hrošy.
4. Siarhiej Čeračeń. 69 miljonaŭ rubloŭ na miesiac = $4300
Heta samy paśpiachovy prykład taho, jak pradstaŭnik kamunistaŭ robić kapitalistyčnyja pośpiechi. Partyjec — dyrektar TAA «Mantaž technika», ale maje dolu jašče ŭ niekalkich biznesach.
5. Ihar Michno. 61 miljon rubloŭ = $3900
Jašče adzin pradprymalnik ad ŁDPB, jon pracuje namieśnikam dyrektara Budaŭniča-mantažnaha ŭpraŭleńnia №215.
6. Dźmitryj Šaŭcoŭ. 49 miljonaŭ rubloŭ = $3100
Narešcie ŭ śpisie źjaŭlajecca pieršy dziejny deputat. Vidavočna, u byłoha hałoŭnaha doktara palikliniki byŭ inšy dachod, aproč deputackaha zarobku. Bo nichto z kalehaŭ Šaŭcova takich hrošaj nie mieŭ.
7. Dźmitryj Burak. 41 miljonaŭ rubloŭ = $2600
Čarhovy pradprymalnik ad ŁDPB, jon dyrektar kampanii «Vientśpiecmantaž».
8. Ihar Kamaroŭski. 41 miljon rubloŭ = $2600
Dyrektar Minskaha vahonaramontnaha zavoda, najchutčej, budzie adnym z pradstaŭnikoŭ kišennaj Respublikanskaj partyi pracy i spraviadlivaści ŭ parłamiencie.
Kamaroŭski ŭžo deputat Minskaha haradskoha savieta deputataŭ, a ciapier pojdzie na pavyšeńnie.
9. Vasil Astroŭski. 40 miljonaŭ rubloŭ = $2500
Samy bahaty pradstaŭnik Partyi BNF maje transpartna-turystyčnuju kampaniju «OstKam-Adyhitryja». Astroŭski uznačalvaje minskuju Radu pa raźvićci pradprymalnictva.
10. Vadzim Łakiza. 39 miljonaŭ rubloŭ = $2400
Jašče adzin biudžetnik, jaki maje patrapić u parłamient, — namieśnik dyrektara Instytuta historyi Akademii navuk. Archieołah uvojdzie ŭ «biełaruskamoŭnuju frakcyju» pałaty pradstaŭnikoŭ.
* * *
Na advarotnym baku rejtynhu — čaćviora kandydataŭ, jakija letaś nie mieli nijakaha dachodu.
Heta dva pradstaŭniki AHP (Dzianis Cichanienka i Volha Majorava), kamunist Dźmitryj Reut i biespartyjny dyrektar Centra daśledavańnia i prahnazavańnia ekanomiki Aleh Ivanoŭ.
Kamientary