Sud vyrašyŭ, što artykuły Eduarda Palčysa — ekstremizm

Sud Centralnaha rajona Minska 25 žniŭnia pačaŭ razhlad spravy ab pryznańni ekstremisckaj «infarmacyjnaj pradukcyi na sajcie 1863x.com».

Mierkavany zasnavalnik i administratar sajta 1863x.com Eduard Palčys, viadomy taksama pad psieŭdanimam «Džon Silvier», znachodzicca ŭ śledčym izalatary №1 h. Minska i na pracesie pa hetaj pryčynie nie prysutničaŭ. Intaresy Palčysa pa jahonaj prośbie pradstaŭlali advakaty Hanna Bachcina i Jaŭhien Masłaŭ.

Pierad pracesam aktyvisty Natalla Haračka, Volha Nikałajčyk i Maksim Viniarski pryjšli da suda pastajać ź listoŭkami i płakatami z zaklikami vyzvalić Palčysa. Na sam praces pryjšli Illa Dabratvor, jaki idzie sioleta ŭ deputaty ad BNF, i Alaksiej Janukievič, staršynia BNF.

Darečy, Haračka raskłała listoŭki na stale sudździ pierad pačatkam pasiadžeńnia — u vyniku pasiadžeńnie pieranieśli ŭ inšuju zalu, a samu Haračka prytrymali ŭ kalidory milicyjanty.

Pryjechała na praces i Viktoryja Palčys, žonka Eduarda.

Pavialičyć

Akramia taho na pracesie prysutničali pradstaŭniki ambasadaŭ ES, Vialikabrytanii i Šviecyi.

Pačałosia pasiedžańnie z chadajnictva pradstaŭnika Śledčaha kamiteta, jaki paprasiŭ zrabić pasiedžańnie zakrytym — bo vyniki siońniašniaha suda nibyta mohuć paŭpłyvać na kryminalnuju spravu, jakuju ŭ dačynieńni da Palčysa rasśleduje SK.

Sudździa Kazłova chadajnictva zadavoliła. Usie, akramia advakata Masłava i pradstaŭnika Śledčaha kamiteta, byli vymušanyja pakinuć zału suda.

Pa słovach advakata Bachcinaj, ekśpiertyza «infarmacyjnaj pradukcyi» sajta ŭžo prajšła i źjaŭlajecca «kopijaj kryminalnaj spravy». Vyniki ekśpiertyzy — u sudzie. Ale samich materyjałaŭ z sajta u sudździ niama, padkreśliła Bachcina.

Sam Palčys siabie ekstremistam nie pryznaŭ, taksama paviedamiła Bachcina. Pa jaje słovach, Eduard adčuvaje siabie narmalna — jana bačyłasia ź im za dzień da pasiadžeńnia.

«Umovy strymańnia narmalnyja, pravy jaho tam nichto nie parušaje», — skazała Bachcina.

Praź niekalki hadzin stała viadoma, što sud usio ž pryznaŭ 9 artykułaŭ z sajta ekstremisckimi.

***

Eduardu Palčysu ŭ červieni było vystaŭlenaje abvinavačvańnie ŭ ździajśnieńni złačynstvaŭ, praduhledžanych č.1 art. 130 Kryminalnaha kodeksu («raspalvańnie rasavaj, nacyjanalnaj ci relihijnaj varožaści abo roźni») i č.2 art. 343 KK («raspaŭsiudžvańnie parnahrafičnych materyjałaŭ»). Usiaho ŭ materyjałach śledstva naličvajecca 9 epizodaŭ raspalvańnia varožaści, 2 epizody — materyjały parnahrafičnaha źmiestu.

• 0
• 0
• 0
• 0
• 0
• 0
• 0
• 0