Prezident ZŠA Barak Abama ŭ piatnicu pavialičyŭ płošču marskoha zapaviednika na Havajskich vyspach u čatyry razy, zrabiŭšy jaho najbujniejšym u śviecie, havorycca ŭ paviedamleńni Biełaha doma.
Tut i nižej fota: AR
Nacyjanalny marski zapaviednik Papanaŭmakiea byŭ stvorany ŭ 2006 hodzie Džordžam Bušam-małodšym.
Ciapier jaho akvatoryja składaje 582.578 kvadratnych mil (kala 1,5 młn kv. km), što ŭ dva ź lišnim razy pieravyšaje płošču Techasa.
Status zapaviednika zabaraniaje kamiercyjnaje rybałoŭstva i zdabyču karysnych vykapniaŭ.
Pryniataje rašeńnie pavinna abaranić zvyš za siem tysiač vidaŭ žyvych istot.
Prybiarežnyja vody, jakija ŭvachodziać u akvatoryju zapaviednika, taksama ličacca śviatym miescam u karennych nasielnikaŭ vyspaŭ.
Vykanaŭčy vice-prezident ekałahičnaj arhanizacyi Pew Charitable Trusts Džošua Rajchart nazvaŭ ich adnym z samych kaštoŭnych u bijałahičnych i kulturnych adnosinach miescaŭ na Ziamli.
«Hrynpis» paličyŭ rašeńnie Abamy mužnym učynkam.
Sa svajho boku, kiraŭnik Asacyjacyi rybapramysłoŭcaŭ Havajaŭ Šon Marcin vykazaŭ rasčaravańnie tym, što prezident biez hramadskaha abmierkavańnia nazaŭždy zakryŭ dla haspadarčaha vykarystańnia terytoryju, roŭnuju pa płoščy štatu Alaska. «Hodnuju ž spadčynu jon pakidaje», — iranična zaŭvažyŭ Marcin u intervju Asašyejted pres.
Rajon viadomy taksama vialikaj kolkaściu patanułych karabloŭ i samalotaŭ, što nahadvajuć ab marskoj bitvie la atoła Midŭej u červieni 1942 hoda, jakaja prymusiła Japoniju da kanca vajny pierajści da abarony i pazbaviła jaje mahčymaści pravodzić jakuju-niebudź supolnuju stratehiju z Hiermanijaj.
Barak Abama, uradženiec Havajaŭ, naviedaje Midŭej na budučym tydni. Za čas svajho prezidenctva jon stvaryŭ abo pavialičyŭ 26 pryrodaachoŭnych zon.
