Partał By24.org Uładzimira Čudziancova zaŭvažyŭ na sajcie Cataloxy abjavu ad budaŭničaj kampanii «Dojlid» («Zodčij»).
Jana była apublikavanaja 10 listapada 2015 i była aktualnaja da 9 sakavika 2016 hoda.
Kampanija šukała ŭ Bieraści rehijanalnaha dyrektara pa prodažach pad kluč draŭlanych damoŭ, vyrablenych u Rasii. Źviartaje na siabie ŭvahu adno z patrabavańniaŭ pracadaŭcy: «aktyŭnaść, piśmiennaje i vyraznaje maŭleńnie bieź biełaruskaha akcentu».
Hetaja ŭmova naŭprost supiarečyć biełaruskamu zakanadaŭstvu, jakoje zabaraniaje dyskryminacyju.
U artykule 14 Pracoŭnaha kodeksa Biełarusi havoryca: «Dyskryminacyja, heta značyć abmiežavańnie ŭ pracoŭnych pravach abo atrymańnie jakich-niebudź pieravah u zaležnaści ad połu, rasy, nacyjanalnaha pachodžańnia, movy, relihijnych ci palityčnych pierakanańniaŭ, udziełu ci niaŭdziełu ŭ prafsajuzach ci inšych hramadskich abjadnańniach, majomasnaha abo słužbovaha stanovišča, niedachopaŭ fizičnaha abo psichičnaha charaktaru, jakija nie pieraškadžajuć vykanańniu adpaviednych pracoŭnych abaviazkaŭ, zabaraniajecca».
Karespandent «Našaj Nivy» źviazaŭsia z pradstaŭnikami kampanii «Zodčij», kamientar budzie atrymany ŭ paniadziełak.
