«Junona», aparat amierykanskaha kaśmičnaha ahienctva NASA, pralacieŭ nad Jupiteram na adlehłaści 4200 kiłamietraŭ ad vierchniaj miažy abłokaŭ, jakija achutvajuć hihanckuju płanietu.
Padvojny zdymak Jupitera, zrobleny «Junonaj» 23 žniŭnia. Fota NASA
Heta samaja karotkaja dystancyja, na jakuju rukatvorny kaśmičny aparat nabližaŭsia da Jupitera.
Jak čakajecca, «Junona» zrobić i pieradaść na Ziamlu zdymki kałasalnych pierasoŭvańniaŭ atmaśfiernych mas płaniety.
Pralatajučy nad Jupiteram u kirunku z poŭnačy na poŭdzień, zond ruchaŭsia z chutkaściu bolš za 200 tysiač kiłamietraŭ u hadzinu.
Zdymki abłokaŭ Jupitera ŭ samym vysokim razroźnieńni NASA raźličvaje apublikavać na budučym tydni.
Adnoj z zadač ekśpiedycyi źjaŭlajecca vyvučeńnie składu płaniety. Śpiecyjalisty NASA spadziajucca daviedacca, ci jość u jaje ćviordaje jadro abo jana całkam składajecca z hazu, jaki źviedvaje nadzvyčajnuju stupień ścisku.
Jašče adna zahadka, jakuju raźličvajuć razhadać navukoŭcy, źviazanaja z samaj prykmietnaj detallu na dysku płaniety — Vialikaj čyrvonaj plamaj Jupitera. Heta hihancki ŭrahan, jaki ziamnyja astranomy nazirajuć užo bolš za 350 hadoŭ.
Paśla ciapierašniaha pralotu centr kiravańnia palotami adpravić «Junonu» na jašče adzin vitok praciahłaściu 53 dni. 19 kastryčnika z dapamohaj ruchavikoŭ zonda śpiecyjalisty NASA majuć namier skaracić pieryjad abaračeńnia vakoł Jupitera da 14 dzion.
Na hetaj arbicie «Junona» budzie znachodzicca da lutaha 2018 hoda, kali jana atrymaje kamandu «nyrnuć» u atmaśfieru Jupitera, što budzie aznačać dla jaje svajho rodu samahubstva.
Kaśmičny aparat apynuŭsia ŭ zonie hravitacyi Jupitera 5 lipienia. Za čas palotu, jaki doŭžyŭsia piać hadoŭ, jon pakryŭ bolš za 2,8 młrd km.
