Sioleta 949-ja hadavina pieršaj letapisanaj zhadki pra Miensk. I chacia zhadanaja letapiscam padzieja, bitva na Niamizie, adbyłasia ŭviesnu, biełaruskaja stalica pa dziŭnaj zaviadzioncy śviatkuje Dzień horada ŭvosień.
Asnoŭnyja śviatkavańni z hetaj nahody razhornucca kala Pałaca sportu i na terytoryi Vierchniaha horada, a ŭsiaho ŭ ramkach Dnia horada projdzie prykładna 90 mierapryjemstvaŭ.
Na 11.00 zapłanavana ŭračystaja cyrymonija ŭskładańnia kvietak ad kiraŭnictva horada da abieliska «Minsk — horad-hieroj» na praśpiekcie Pieramožcaŭ. U joj voźmie ŭdzieł staršynia Minharvykankama Andrej Šorac.
U 12.00 u kancertnaj zale «Vierchni horad» pačniecca cyrymonija šlubu dzieviaci par z roznych rajonaŭ Minska, jakaja stała ŭžo tradycyjnaj u Dzień horada.
U hety ž čas kala Pałaca sportu adkryjecca śviatočnaja prahrama z udziełam tvorčych kalektyvaŭ i majstroŭ mastactvaŭ Biełarusi. Budzie pracavać vystava-kirmaš majstroŭ narodnaj tvorčaści «Horad majstroŭ», kuchary staličnaha hramadskaha charčavańnia praviaduć majstar-kłasy pa pryhatavańni straŭ biełaruskaj kuchni, na scenie vystupiać staličnyja kavier-bendy. Tut ža adbudziecca spartyŭnaje mierapryjemstva «Žalezny pažarny» i mižnarodny turnir pa siłavym ekstrymie Minsk Open Cup-2016.
U Minskim pałacy dziaciej i moładzi na Staravilenskim trakcie apoŭdni pačniecca Śviata siamji. A pa vulicy Staletava, 1, u 12.00 adkryjecca Park ekstremalnych vidaŭ sportu.
U 13.00 na terytoryi Vierchniaha horada budzie ŭračysta adkryty pomnik Vincentu Duninu-Marcinkieviču i Stanisłavu Maniušku.
U 18.00 kala Pałaca sportu muzyčnuju prahramu «Kłasika lubimamu horadu» pradstavić Dziaržaŭny simfaničny arkiestr pad kiraŭnictvam Alaksandra Anisimava. Na kancercie taksama vystupiać papularnyja biełaruskija vykanaŭcy Dźmitryj Kałdun, hurt «Drazdy» i inšyja.
U hety ž čas u teatry opiery i baleta adbudziecca ŭznaharodžvańnie pieramožcaŭ tradycyjnaha konkursu «Minčanin hoda», a zatym — kancert artystaŭ biełaruskaj opiery.
Zavieršycca subota muzyčna-piratechničnym fiejervierk-šou ŭ rajonie Pałaca sportu, jakoje pačniecca ŭ 22.00.
Śviatočnyja mierapryjemstvy projduć siońnia va ŭsich rajonach horada, u tym liku kala kompleksu «Čyžoŭka-Arena», u Łošyckim parku, parkach imia Čaluskincaŭ, Horkaha, Paŭłava, 60-hodździa Kastryčnika, kala Pałaca čyhunačnikaŭ, na placoŭcy ŭ «Lido» ŭ rajonie Kamaroŭskaha rynku, u parkach «Pieramoha» i «Civali».
Uvieś skład staličnaj milicyi ŭ hetyja dni pieraviedzieny na ŭzmocnieny varyjant niasieńnia słužby z kruhłasutačnaj achovaj. Miescy masavych mierapryjemstvaŭ buduć aharodžanyja, prachod da ich budzie ažyćciaŭlacca praz kantrolna-prapusknyja punkty. Tudy nielha budzie prachodzić ź viełasipiedami, žyviołami, zabaroniena pranosić pradmiety, zdolnyja nanieści cialesnyja paškodžańni.
Hramadzianam rekamiendujecca minimizavać kolkaść ručnoj pakłažy, u tym liku sumak vialikich pamieraŭ. Kala Pałaca sportu buduć ustanoŭleny kamiery zachoŭvańnia, kudy možna budzie zdać vialikuju ručnuju pakłažu, zaplečniki i sumki. U HUUS rajać prychodzić na masavyja mierapryjemstvy zahadzia, za 20—30 chvilin da pačatku. Tradycyjna tudy nie prapuściać hramadzian u stanie ałkaholnaha i narkatyčnaha apjanieńnia.
Ułasnaje śviata źjaviłasia ŭ Minska ŭ 1986 hodzie — tady jano nazyvałasia «mastacka-spartyŭnaje śviata» i adznačałasia 3 lipienia, u dzień vyzvaleńnia horada ad niamiecka-fašysckich zachopnikaŭ. Paśla listapadaŭskaha refierendumu 1996 hoda 3 lipienia atrymała aficyjny status Dnia Niezaležnaści Biełarusi, a Dzień horada stali adznačać u Minsku ŭ druhija vychadnyja vieraśnia. U hetym hodzie śviata horada ssunuta na tydzień raniej z-za parłamienckich vybaraŭ, pryznačanych na 11 vieraśnia.
Ciapier čytajuć
«Kaleśnikava kaža, što nie źbirajecca vychodzić, pakul nie vyjdzie apošni z palitviaźniaŭ»22
«Kaleśnikava kaža, što nie źbirajecca vychodzić, pakul nie vyjdzie apošni z palitviaźniaŭ»
«Svoj nos ź Biełastoka jany nie vysoŭvajuć». Biełarusy Padlašša skardziacca, što biełarusy novaj chvali emihracyi nie zacikaŭlenyja supolnymi spravami2727
Kamientary