Zavieršana rasśledavańnie kryminalnaj spravy ŭ dačynieńni da Viačasłava Davydoviča, zasnavalnika i staršyni mižnarodnaj dabračynnaj hramadskaj arhanizacyi «U dapamohu dzieciam-sirotam». Jamu pradjaŭlenaje abvinavačvańnie ŭ ździajśnieńni złačynstva suprać pałavoj niedatykalnaści niepaŭnaletnich, a taksama šerahu ekanamičnych złačynstvaŭ.
«Padčas śledstva ŭstanoŭlena, što ad krasavika 2010 hoda pa listapad 2012 hoda jon ździejśniŭ dziejańni seksualnaha charaktaru ŭ dačynieńni da vychavancaŭ dziciačych damoŭ», — raspaviała aficyjny pradstaŭnik Śledčaha kamiteta Biełarusi Julija Hančarova.
Dziejańni Davydoviča śledčymi kvalifikavanyja adrazu pa piaci artykułach Kryminalnaha kodeksa Biełarusi: č.3 art. 167 (Hvałtoŭnyja dziejańni seksualnaha charaktaru, učynienyja ŭ dačynieńni da zaviedama małaletniaha), art. 168 (Inšyja dziejańni sieksualnaha charaktaru z asobaj, jakaja nie dasiahnuła šasnaccacihadovaha ŭzrostu), č.2 art. 233 (Niezakonnaja pradprymalnickaja dziejnaść), č.2 art. 424 (Złoŭžyvańnie słužbovymi paŭnamoctvami), č.2 art. 427 (Słužbovaja padrobka).
Kryminalnaja sprava vyvučanaja prakuroram i nakiravanaja ŭ sud.
Nahadajem, Viačasłaŭ Davydovič užo byŭ pad śledstvam pa 168 artykule Kryminalnaha kodeksu (Pałavyja znosiny i inšyja dziejańni sieksualnaha charaktaru z asobaj, jakaja nie dasiahnuła šasnaccacihadovaha ŭzrostu). Sprava była ŭzbudžanaja 25 lipienia 2014 hoda, ale zimoj taho ž hoda praz adsutnaść dokazaŭ SK spyniŭ jaje. U červieni 2015 hoda sprava była adnoŭlenaja.
Ciapier Viačasłaŭ Davydovič adbyvaje pakarańnie za ŭčynieńnie ekanamičnaha złačynstva. U lutym 2014 hoda sud pryhavaryŭ jaho da 4 hadoŭ pazbaŭleńnia voli za niezakonnuju pradprymalnickuju dziejnaść, źviazanuju z atrymańniem dachodu ŭ asabliva bujnym pamiery.
Kamientary