Data abviaščeńnia ŭ sudzie Maskoŭskaha rajona Minska prysudu Kanstancinu Šaravieru, byłomu hienieralnamu dyrektaru baskietbolnaha kłuba «Cmoki-Minsk», znoŭ źmienienaja. Jak paviedamiła pamočnik staršyni rajonnaha suda Safija Asmałoŭskaja, prysud namiečana abviaścić 7 vieraśnia. Sudździa padoŭžyŭ svajo znachodžańnie ŭ daradčym pakoi.
Heta ŭžo druhi pieranos. Spačatku płanavałasia, što prysud budzie abvieščany 31 žniŭnia, zatym — 5 vieraśnia.
Kanstancin Šaraviera znachodzicca pad vartaj z 14 krasavika 2015 hoda. Byłomu spartyŭnamu funkcyjanieru inkryminujecca kradziež šlacham złoŭžyvańnia słužbovymi paŭnamoctvami i złoŭžyvańnie słužbovymi paŭnamoctvami, jakoje paciahnuła ciažkija nastupstvy. Jon abvinavačvajecca ŭ ździajśnieńni złačynstvaŭ, praduhledžanych č. 4 art. 210, č. 3 art. 424 i č. 2 art. 210 KK.
U pryvatnaści Šaravieru stavicca ŭ vinu kradziež hrašovych srodkaŭ kłuba, zališnie naličanych rabotnikam i spartsmienam, na asnovie roźnicy ŭ pamiery ŭznaharodžańniaŭ u pryvatna abumoŭlenych hiendyrektaram i aficyjna aformlenych kantraktach.
Sumy mahli adroźnivacca ŭ razy. Škoda ad hetaj dziejnaści aceńvajecca bolš čym u 6,2 młrd rubloŭ. Taksama Šaraviera abvinavačvajecca ŭ arhanizacyi vyvadu z abarotu kłuba srodkaŭ, što vydzialajucca na kampiensacyju charčavańnia spartsmienam padčas vučebna-trenirovačnych zboraŭ.
Pa materyjałach kryminalnaj spravy Šaraviera braŭ hrošy, jakija pryznačalisia supracoŭnikam. Aficyjnaja i realnaja zarpłata istotna adroźnivalisia. Jak tolki rabotnik atrymlivaŭ bankaŭskuju kartku, abvinavačany adbiraŭ jaje razam ź pin-kodam. U bankamacie jon zdymaŭ hrošy i pieradavaŭ padnačalenamu tolki častku naličanaj sumy, pra jakuju jany damaŭlalisia raniej u vusnaj formie. Akramia taho, hulcy i treniery padpisvali kanfidencyjnaje pahadnieńnie da damovy, adnak sumu kantraktu Šaraviera dapisvaŭ paźniej, kali podpis supracoŭnika ŭžo stajaŭ u dakumiencie.
Častku zarobku pieradavali z ruk u ruki ŭ buchhałteryi. U hetym vypadku reštu, jak adznačana ŭ abvinavačvańni, Kanstancin Šaraviera zabiraŭ i vykarystoŭvaŭ pa svaim mierkavańni. Heta tyčyłasia zarpłaty jak biełaruskich hulcoŭ, tak i lehijanieraŭ «Cmokaŭ». Taksama śpisvalisia srodki, jakija pryznačalisia na kampiensacyju charčavańnia na zborach i treniroŭkach. U materyjałach spravy majucca źviestki bolš čym pra 60 epizodaŭ złačynnych dziejańniaŭ.
24 žniŭnia dziaržabvinavaŭca paprasiŭ pryhavaryć Šaravieru da šaści hadoŭ kałonii ŭzmocnienaha režymu z kanfiskacyjaj majomaści.
