Čamu ŭ Biełarusi takija darahija impartnyja leki?

Kožny sutykaŭsia ź situacyjaj, kali niekatoryja impartnyja leki kaštujuć u Biełarusi vielmi doraha. I kab zekanomić, našyja suajčyńniki jeduć pa žyćciova nieabchodnyja preparaty za miažu. Časam tańniej kupić kvitok u Vilniu, Kijeŭ ci Maskvu i nabyć tam nieabchodnyja leki. I ŭ vas jašče zastanucca hrošy na zvarotny kvitok i adpačynak.

«Naša Niva» paraŭnała košty na preparaty i skłała śpis impartnych lekavych preparataŭ, jakija kaštujuć u Biełarusi značna daražej, čym u susiednich krainach. Pry paraŭnańni cen my nie ŭličvali źnižki i lhoty ŭ aptečnych sietkach, a taksama padbirali preparaty z adnolkavaj kolkaściu dziejnaha rečyva.

Karaksan

tabł. 5 mh, 56 št., vytvorca: Servier Industrie (Francyja)

Kijeŭ 17,52 rub. — 23,14 rub.

Maskva 24,30 rub. — 38,32 rub.

Minsk 52,68 rub. — 73,44 rub.

Płaviks

tabł. 75 mh, 14 št., vytvorca: Sanofi (Francyja)

Kijeŭ 28,60 rub. — 51,08 rub.

Maskva 39,44 rub. — 58,34 rub.

Minsk 80,20 rub. — 104,48 rub.

Ryha — 16,42 rub.

Nalipreł bi-forte

10 mh + 2.5 mh 30 št., vytvorca: Servier (Francyja)

Kijeŭ 12,87 rub. — 17,15 rub.

Maskva 18,66 rub. — 35,01 rub.

Minsk 38,16 rub. — 47,35 rub.

Siebiproks šampuń

60 mł, vytvorca: Ścifeł Łabaratoryz (Irłandyja)

Kijeŭ 7,26 rub. — 9,48 rub.

Maskva 10,34 rub. — 28,18 rub.

Minsk 20,94 rub. — 28,11 rub.

Fluarescyt

100 mh/mł, 5 mł, 12 št. Ałkon Łabaratoryz (Bielhija)

Kijeŭ 169 rub. — 180 rub.

Vilnia 292,52 rub.

Minsk 400,56 rub. — 404,52 rub.

Čamu ŭ Biełarusi daražej?

U Biełarusi ceny na impartnyja leki farmujucca ŭ adpaviednaści z ukazam prezidenta ad 11.08.2005 h. № 366 «Ab farmiravańni cen na lekavyja srodki, vyraby miedycynskaha pryznačeńnia i miedycynskuju techniku». Zhodna ź im, apteki mohuć pryznačać handlovuju nadbaŭku da 30%.

Čynoŭniki ź Ministerstva achovy zdaroŭja raniej adznačali, što roźnica ŭ cenach lekaŭ u roznych krainach mahła być vyklikana vahańniami na valutnym rynku. Ale tolki hetym rastłumačyć roźnicu ŭ cenach preparataŭ nielha. Pa-pieršaje, nacyjanalnyja valuty Rasii, Ukrainy i Biełarusi ŭžo bolš za hod majuć adnosna stabilnyja kursy. Pa-druhoje, sioleta Alaksandr Łukašenka padpisaŭ novy ŭkaz №228, zhodna ź jakim aptovyja i handlovyja nadbaŭki na miedycynskija tavary ŭ Biełarusi adviazali ad dalara. Niahledziačy na heta, situacyja istotna nie źmianiłasia.

Prablemu vysokich cen na leki razumiejuć i ŭ Ministerstvie achovy zdaroŭja. Namieśnik ministra Valer Šaŭčuk ličyć, što hałoŭnaja prablema — maleńki abjom rynku.

«Mnohija zamiežnyja vytvorcy pry eksparcie svajoj pradukcyi ŭličvajuć abjom rynku. Kali jaho abjom vialiki, cana, adpaviedna, nižejšaja, — tłumačyć Šaŭčuk. — Zrazumieła, što farmaceŭtyčny rynak Biełarusi nie paraŭnać z rasijskim. U hrašovym vyražeńni jomistaść biełaruskaha rynku składaje 700 miljonaŭ dalaraŭ, rasijskaha — kala 20 miljardaŭ dalaraŭ».

Kab daviedacca pazicyju vytvorcaŭ pa hetym pytańni, «Naša Niva» źviarnułasia pa kamientar da farmaceŭtyčnych kampanij.

U biełaruskim pradstaŭnictvie kampanii «Servier» adznačyli, što farmiravańnie cany na leki — heta davoli składany praces. Cana składajecca ź vialikaj kolkaści čyńnikaŭ. Niekatoryja ź ich adnolkavyja dla kožnaj krainy: vartaść daśledavańniaŭ, raspracoŭki i vytvorčaści lekaŭ. A niekatoryja mohuć adroźnivacca: padatki, košt dystrybucyi, pamier miascovaha rynku i ceny miascovych preparataŭ anałahičnaha kłasa. Farmaceŭtyčnyja kampanii nie mohuć upłyvać na bolšaść hetych čyńnikaŭ, i ceny ŭ asobnych krainach zaležać u pieršuju čarhu ad miascovych umoŭ.

Kali paraŭnoŭvać ceny na preparaty ŭ Biełarusi i Rasii, to roźnica vyklikana małym pamieram biełaruskaha rynku i pravavymi abmiežavańniami dla zamiežnych vytvorcaŭ, jakija značna vyraśli ŭ apošnija hady.

Biełaruskaje pradstaŭnictva «Sanofi» taksama źviarnuła ŭvahu na asnoŭnyja faktary farmiravańnia cen na leki: asablivaści sistemy dziaržaŭnaha zabieśpiačeńnia lekami, schiemy dziaržaŭnaha finansavańnia roznych katehoryj nasielnictva, patrabavańni dziaržavy da rehulavańnia cen i h.d. Biez uliku hetych faktaraŭ paraŭnoŭvać ceny ŭ roznych krainach francuzskaja kampanija ličyć nie zusim karektnym.

A jakija leki vy nabyvajecie za miažoj pa pryčynie ich darahoŭli ŭ Biełarusi? Pišycie ŭ kamientarach.

• 0
• 0
• 0
• 0
• 0
• 0
• 0
• 0