Pry padzieńni lifta na budoŭli ŭ Maskvie zahinuŭ hramadzianin Biełarusi. Pra heta paviedamiła namieśnik načalnika ŭpraŭleńnia infarmacyi — načalnik adździeła pres-słužby MZS Biełarusi Maryja Vańšyna.
«My paćviardžajem, što siarod zahinułych na budaŭničym abjekcie ŭ Maskvie byŭ adzin hramadzianin Biełarusi», — skazała Maryja Vańšyna.
Pavodle jaje słoŭ, konsulski adździeł pasolstva Biełarusi ŭ Maskvie zajmajecca ŭsimi nieabchodnymi pytańniami.
Trahiedyja adbyłasia 23 vieraśnia na budoŭli doma pa vulicy Šanohina ŭ Maskvie. Hruzavy lift, u jakim znachodziłasia piaciora rabotnikaŭ roznych padradnych kampanij ź inžyniernaj słužby, zvaliŭsia z vyšyni. Troje mužčyn pamierli na miescy, jašče dvoje — pa darozie ŭ balnicu.
Pa fakcie zdareńnia raspačataja kryminalnaja sprava pa č. 3 art. 216 KK Rasii (parušeńnie praviłaŭ biaśpieki pry praviadzieńni budaŭničych rabot, što paciahnuła pa nieaściarožnaści hibiel dźviuch i bolš asob).
