Zamiežnyja inviestary, jakija śpiecyjalizujucca na novych rynkach, nie ŭsprymajuć siońnia Biełaruś jak krainu, kudy nieabchodna ŭkładvać inviestycyi, zajaviŭ dyrektar-kiraŭnik inviestycyjnaha banka Rothschild pa krainach SND Džavani Salvieci padčas kanfierencyi «Pašyrajučy haryzonty: inviestycyi, finansy, raźvićcio», jakaja 29—30 vieraśnia prachodzić u Minsku.
Salvieci adznačyŭ, što pryciahnieńnie pramych zamiežnych inviestycyj važnaje dla luboj krainy, bo inviestary prynosiać u ekanomiku kapitał, padatki, technałohii.
«Usio heta dobra adbivajecca na abnaŭleńni ekanomiki. Ale važny i inšy aśpiekt. Jak pakazvaje praktyka, čym bolš zamiežnyja inviestary ŭkładvajuć u krainu, tym bolš jany pra jaje kłapociacca», — skazaŭ Salvieci.
Razam z tym «Biełaruś nie ŭsprymajecca siońnia surjozna inviestarami jak kraina, u prajekty na terytoryi jakoj treba ŭkładać inviestycyi», adznačyŭ jon. Jak śledstva, dadaŭ Salvieci, uzrovień pramych zamiežnych inviestycyj u raźliku na dušu nasielnictva ŭ Biełarusi istotna nižejšy, čym u inšych krainach.
«Za apošnija piać hadoŭ Biełaruś ničoha surjoznaha nie vystaviła na prodaž, kab pryciahnuć zamiežnyja inviestycyi», — kanstatavaŭ pradstaŭnik banka.
Jon adznačyŭ, što ŭ biełaruskaj ekanomicy praciahvaje adyhryvać vyznačalnuju rolu dziaržsiektar, u toj čas jak u jeŭrapiejskich krainach (Polščy, Słavakii, Čechii) uniosak pryvatnaha siektara ŭ ekanomiku składaje bolš za 70%.
U suviazi z hetym Salvieci źviarnuŭ uvahu na toje, što ŭ jeŭrapiejskich krainach z raźvitym pryvatnym siektaram VUP na dušu nasielnictva składaje 15 i bolš tysiač dołaraŭ, a ŭ Biełarusi — pryblizna 6 tys.
«Takim čynam, isnuje pramaja karelacyja pamiž raźvićciom pryvatnaha siektara i ŭzroŭniem dabrabytu ŭ krainie. Heta ŭparty fakt», — padkreśliŭ pradstaŭnik banka «Rotšyld».
Na jaho dumku, dla pavyšeńnia cikavaści inviestaraŭ da biełaruskaj ekanomiki varta było b realizavać šerah piłotnych pryvatyzacyjnych prajektaŭ. «Kali b ja pracavaŭ u biełaruskim uradzie, to realizavaŭ by paru-trojku prajektaŭ z udziełam «błakitnych fišak», kab Biełaruś źjaviłasia na karcie zamiežnych inviestaraŭ. Ciapier jaje tam niama, na žal», — zajaviŭ Salvieci.
Jak paviedamlałasia, premjer-ministr Andrej Kabiakoŭ zajaviŭ na forumie, što Biełaruś pakul nie atrymała taho prytoku inviestycyj, na jaki raźličvała. «Nie apošniuju rolu tut adyhryvaje i niedastatkovaja infarmavanaść ab najaŭnych u Biełarusi patencyjale i mahčymaściach. My metanakiravana pracujem nad pieraadoleńniem hetych niedachopaŭ. Biełaruś praviała šerah bujnych inviestycyjnych mierapryjemstvaŭ u Ńju-Jorku, Łondanie, Vienie, Stambule. Siońniašni forum praciahvaje pieralik takich mierapryjemstvaŭ», — skazaŭ Kabiakoŭ.
Razam z tym jon ličyć, što ŭ krainie sfarmavanaja niadrennaja zakanadaŭčaja baza dla pryciahnieńnia zamiežnych inviestycyj. «Značnaja častka terytoryi krainy — heta prefierencyjnyja režymy, jakija paśpiachova funkcyjanujuć, pry raźmiaščeńni biźniesu ŭ miežach svabodnych ekanamičnych zon, Parku vysokich technałohij, industryjalnaha parku «Vialiki kamień», na terytoryi małych i siarednich haradoŭ Biełarusi», — adznačyŭ premjer-ministr.
Akramia taho, pavodle jaho słoŭ, Biełaruś paśladoŭna pierachodzić na novy ŭzrovień uzajemadziejańnia ź mižnarodnymi finansavymi instytutami.
Ciapier čytajuć
Ich Zareckaja: deputat-jabaćka Aleh Navicki kinuŭ biełaruskich inviestaraŭ na miljony dalaraŭ. Detali schiemy2
Kamientary