U Polščy ciaham apošnich hadoŭ całkam źmianiłasia struktura koštaŭ, što tyčycca padarožžaŭ pa krainie i za miažoj. Napiaredadni vakacyjnaha sezonu naš karespandent u Varšavie Alaksiej Dzikavicki spraŭdžvaŭ, jak najtańniej biełarusam padarožničać pa Polščy i dalej za jaje miežy.
Kali vy ŭžo pierasiekli polska-biełaruskuju miažu i, prykładam, nakiroŭvajeciesia ŭ Varšavu, dyk nie śpiašajciesia adrazu siadać u ciahnik – ciapier jość ceły šerah aŭtobusnych kampanijaŭ, jakija zaviazuć vas u stalicu značna tańniej.
Prykładam, kvitok na chutki ciahnik ź Białaj Padlaski ŭ Varšavu kaštuje 32 złotyja. Za hetyja ž hrošy aŭtobus zaviazie vas tudy i nazad (13 złotych u adzin bok), pry hetym zastaniecca jašče na dva kufli miascovaha piva – zazirnicie na miascovy aŭtavakzał. Heta tyčycca taksama Biełastoku i inšych polskich haradoŭ.
Pierad padarožžam varta spraŭdzić košty, čas i raskład u internecie – dastatkova ŭvieści ŭ pošukavym partale słovy «PKS» ci «Polski Express».
Tym, chto abiraje padarožža samalotam, varta viedać, što za apošnija niekalki hadoŭ u Polščy mocna raźviŭsia rynak tannych avijakampanijaŭ – ich niekalki i jany mocna kankurujuć pamiž saboj, u vyniku čaho vyjhraje klijent. Z Varšavy ŭ Stakholm, Barselonu ci Kapenhahien možna zalacieć ciapier usiaho za 70-100 dalaraŭ.
Krychu daražejšyja ad čyhunki i avijapieraloty ŭnutry Polščy, ale zalacieć z Varšavy, prykładam, da Hdańska možna mienš čym za hadzinu, u toj čas jak padarožža ciahnikom praciahvajecca čatyry hadziny.
Tut varta pamiatać, što tannyja avijalinii zvyčajna nia majuć ofisaŭ u horadzie i kvitki ŭ ich rezervujucca i kuplajucca praź internet – atrymać ich možna ŭžo ŭ časie pasadki. Znajści tannyja pieraloty ŭ Polščy možna taksama praz pošukavy server – treba ŭvieści, naprykład, słovazłučeńnie «tanie linie». Varta, adnak, pamiatać, što z-za mocnaj kankurencyi jość niebiaśpieka, što tannaja avijalinija, u jakoj vy nabyli kvitok moža abankrucicca.
Nu a što ž čyhunka?
Čyhunka zmahajecca za klijentaŭ i prapanoŭvaje novyja źnižki i vyhody. Kali vy jedziecie siamjoj ź dziećmi, spytajciesia ŭ kasie pra siamiejny bilet (bilet rodzinny) – heta tańniej prykładna na tracinu. Pajechać čyhunkaj z Varšavy dalej za miažu da šerahu eŭrapiejskich stalicaŭ možna za fiksavany košt, niezaležna ad maršrutu, jaki vy abiarecie, ci kolkaści pierasadak.
Dla pasažyraŭ ciahnikoŭ «Intercity» na šerahu vakzałaŭ pabudavali admysłovyja zali čakańnia, dzie možna koštam firmy napicca kavy, a taksama atrymać usiu infarmacyju pra dalejšaje padarožža.
Polskaja čyhunka ŭ internecie: www.pkp.pl
Alaksiej Dzikavicki, Radyjo Svaboda
