Dadatkovyja miery pa abaronie pravoŭ pracoŭnych abmiarkoŭvalisia 24 kastryčnika na rabočaj sustrečy Alaksandra Łukašenki sa staršynioj Fiederacyi prafsajuzaŭ Biełarusi Michaiłam Ordam.
Jak paviedamlaje pres-słužba prezidenta, na sustrečy było adznačana, što manitorynh pradpryjemstvaŭ z boku FPB pakazaŭ najaŭnaść prablemy «schavanaha skaračeńnia», kali aptymizacyja kolkaści rabotnikaŭ prachodzić šlacham niepraciahu kantraktaŭ abo prymusu da zvalnieńnia. Takim čynam najmalnik sprabuje skaracić vydatki pradpryjemstva.
Łukašenka vykazaŭsia kateharyčna suprać vyrašeńnia prablemnych pytańniaŭ za košt zvalnieńnia rabotnikaŭ. Pry hetym jon źviarnuŭ uvahu, što abarona pravoŭ pracoŭnych — hałoŭnaja zadača i asnova sacyjalnaj dziaržavy.
Kiraŭnik dziaržavy byŭ prainfarmavany, što FPB prapanuje dać dobrasumlennym rabotnikam šerah dadatkovych harantyj pry kantraktnaj formie najmu.
Padčas sustrečy Łukašenka taksama abmierkavaŭ z Ordam realizacyju hienieralnaha pahadnieńnia pamiž biełaruskim uradam, respublikanskimi abjadnańniami najmalnikaŭ i prafsajuzaŭ. Kiraŭnik dziaržavy padkreśliŭ, što ŭsie damoŭlenaści pavinny vykonvacca ŭ poŭnym abjomie.
Łukašenka padrabiazna cikaviŭsia, jak prachodzić madernizacyja struktury FPB. Na jaho dumku, praca ŭ hetym kirunku pavinna praciahvacca ŭ adpaviednaści z vopytam viadučych krain. Aptymizujucca ŭsie haliny ekanomiki, i prafsajuzy nie mohuć zastyć na miescy i być u baku ad hetaha pracesu, adznačyŭ Łukašenka.
Orda taksama prainfarmavaŭ kiraŭnika dziaržavy pra stanovišča spraŭ na TAA «Motaviełazavod», stan vytvorčaści i situacyju ŭ pracoŭnym kalektyvie. Było adznačana, što zavod ni pry jakich abstavinach zakryvać nielha, na im nieabchodna naładzić paŭnavartasnuju vytvorčaść.
Nahadajem, padčas pasłańnia da naroda i parłamienta 21 krasavika Alaksandr Łukašenka zajaviŭ pra nieabchodnaść «źviarnuć uvahu na efiektyŭnuju zaniataść ludziej, i tut nie abyścisia biez aptymizacyi kolkaści rabotnikaŭ». «Na kožnaje skaročanaje miesca pavinna być stvoranaje novaje, vysokapradukcyjnaje, — padkreśliŭ Łukašenka. — Kali raptam na MAZie, BiełAZie adbyvajecca aptymizacyja i vyzvalajecca ennaja kolkaść rabotnikaŭ, hetych ludziej pavinny pieravieści za ruku praz darohu i pracaŭładkavać na novym pracoŭnym miescy, a nie vykidać na vulicu. Patrabavańnie za heta budzie ŭ hetym hodzie žorstkaje». Jon nahadaŭ pra zadańnie ŭradu stvaryć sioleta 50 tysiač novych pracoŭnych miescaŭ.
Miž tym, pavodle apošnich źviestak Biełstata, u ekanomicy Biełarusi ŭ žniŭni 2016 hoda było zaniata 4 młn 396 tys. čałaviek, što amal na 84 tys. mienš, čym hod tamu.
Ekśpierty adznačajuć, što ŭzrovień zaniataści nasielnictva ŭ Biełarusi źniziŭsia da samaj nizkaj za apošnija 12 hadoŭ adznaki. Jak źviartajuć uvahu daśledčyki ŭ analityčnym ahladzie «Ekanamičnyja tendencyi ŭ Biełarusi», padrychtavanym centram sacyjalna-ekanamičnych daśledavańniaŭ CASE Belarus, na praciahu dvuch minułych kvartałaŭ kolkaść zaniataha nasielnictva ŭ krainie «źnižałasia niebyvałymi tempami». U absalutnych ličbach štokvartalnyja straty składali 40 tysiač zaniatych. Takim čynam, za pieršaje paŭhodździe zaniatych u ekanomicy stała mienš na 80 tysiač.
Pa padlikach daśledčykaŭ, u vyniku ŭzrovień zaniataści ŭ druhim kvartale ŭpaŭ da biesprecedentna nizkaj adznaki — 4,402 miljona čałaviek. Raniej histaryčny minimum uzroŭniu zaniataści byŭ zafiksavany ŭ čaćviortym kvartale 2004 hoda — 4,420 młn.
«Takim čynam, zavajovy piacihodki 2006—2010 hadoŭ, jakaja ŭvajšła ŭ historyju jak piacihodka vysokich tempaŭ rostu VUP i zaniataści, całkam stračanyja. I heta biez uliku pastajannaha z 2012 hoda źmianieńnia mietadałohii ŭliku pracoŭnych resursaŭ, dziakujučy jakim zaniataść pastajanna papaŭniałasia na paru dziesiatkaŭ tysiač — u apošni raz, naprykład, «daŭličyli» ramieśnikaŭ», — padkreślivajuć aŭtary ahladu.
