Biełaruś, jakaja zabłakavała letam myty na impart ukrainskaha fierasilikamarhancu (FSM) u Jeŭrazijski ekanamičny sajuz (JEAES), pahadziłasia na achoŭnuju mieru ŭ abmien na źnižku ŭ 20% ad Čelabinskaha elektramietałurhičnaha kambinata (ČEMK). Pra heta piša hazieta «Kommiersant».
U kancy minułaha tydnia na pasiadžeńni Jeŭrazijskaj mižuradavaha savieta premjer-ministr Biełarusi Andrej Kabiakoŭ skazaŭ, što dziakujučy kanstruktyŭnaj pazicyi pa vynikach pieramoŭ zacikaŭlenych subjektaŭ haspadarańnia baki znajšli ŭzajemaprymalnuju raźviazku pa pytańni prymianieńnia antydempinhavaj miery ŭ dačynieńni da fierasilikamarhancu, što ŭvozicca na mytnuju terytoryju JEAES. Detalaŭ premjer nie raskryŭ. Adnak na spravie akazałasia, što Biełaruś atrymała dla siabie peŭnyja prefierencyi.
Nahadajem, u červieni Jeŭrazijskaja ekanamičnaja kamisija abviaściła ab uviadzieńni piacihadovaj pošliny ŭ 26,35% dla Nikopalskaha, Zaparožskaha i Stachanaŭskaha zavodaŭ fieraspłavaŭ hrupy «Pryvat» ukrainskaha aliharcha Ihara Kałamojskaha (u 2014 hodzie pastavili ŭ RF syravinu na 200 młn dalaraŭ). Ale ŭ kancy lipienia kamisija niečakana abviaściła, što rašeńnie prypyniajecca na termin, nieabchodny dla razhladu pytańnia ŭ dačynieńni da hetaha rašeńnia Jeŭrazijskim mižuradavym savietam.
Biełaruski mietałurhičny zavod (BMZ) i niekalki rasijskich spažyŭcoŭ spačatku supraciŭlalisia ŭviadzieńniu achoŭnych mier, bajučysia deficytu i pavyšeńnia cen. Ale kansalidavanaj pazicyi ŭ rasijskich mietałurhaŭ nie było, zatoje Biełaruś zmahła vynieści pytańnie na mižuradavy saviet navat paśla taho, jak JEEK uviała pošlinu bolšaściu hałasoŭ.
Pa słovach krynic rasijskaha vydańnia, sprava ŭ tym, što najbujniejšy rasijski vytvorca fieraspłavaŭ ČEMK (uvachodzić u chołdynh «Aryjant» Alaksandra Arystava i Juryja Ancipava), jaki inicyjavaŭ uviadzieńnie pošliny, pahadziŭsia dać BMZ źnižku ŭ 20% da spotavych cenach na FSM. «Heta biesprecedentnaja źnižka», — kaža adzin z surazmoŭcaŭ, ale nie moža nazvać dakładna abjomy spažyvańnia biełarusaŭ. Krynica «Kommiersanta», znajomaja z damoŭlenaściami bakoŭ, kaža, što ŭ ČEMK ź biełarusami «zaklučana kompleksnaje pahadnieńnie, havorka idzie nie tolki pra źnižki». Pavodle jaho słoŭ, kantrakty pamiž mietałurhami i pastaŭščykami fieraspłavaŭ karotkaterminovyja, da hoda maksimum, a cenaŭtvareńnie na tenderach budujecca na bazie zachodniejeŭrapiejskich katyrovak syraviny analityčnaj hrupy CRU.
Na dumku analitykaŭ, źnižku ŭ 20%, pradstaŭlenuju BMZ, nielha nazvać istotnaj dla ČEMK, rasijskaja kampanija ŭ vyniku atrymlivaje bolšy ŭpłyŭ na rasijskich mietałurhaŭ z-za abmiežavańnia impartu z Ukrainy (174 tys. t u 2014 h. i 130 tys. t u 2015 h.). Akramia hetaha, cana tavaru padymajecca na vieličyniu impartnych pošlin, tak što, pa sutnaści, havorka idzie ab zachavańni statusa-kvo dla Biełarusi i bolš ahresiŭnaj cenavaj prapanovie dla spažyŭcoŭ u Rasii.
Va Ukrainskaj asacyjacyi vytvorcaŭ fieraspłavaŭ (UkrFA) raniej zajaŭlali, što ŭviadzieńnie pošliny na ŭkrainski fierasilikamarhaniec udaryć, pierš za ŭsio, pa spažyŭcach ukrainskaj pradukcyi ŭ krainach JEAES, jakija akazvajucca takim čynam całkam zaležnymi ad palityčnych ambicyj adnoj krainy — Rasii.
Fierasilikamarhaniec vykarystoŭvajecca ŭ jakaści dadatku pry vytvorčaści stali.
Kamientary