Minekanomiki prahnazuje źnižeńnie VUP u Biełarusi da 3% u 2016 hodzie z-za niedapastavak rasijskaj nafty, paviedamiŭ žurnalistam 29 listapada ŭ Pałacie pradstaŭnikoŭ ministr ekanomiki Uładzimir Zinoŭski.
«Nie ŭsie sprahnazavanyja makraekanamičnyja pakazčyki buduć vykananyja z-za roznych pryčyn — źniešnich i ŭnutranych faktaraŭ. Niedachop naftavaj syraviny dla pierapracoŭki pryvioŭ da taho, što my hublajem pakazčyk VUP. Pavodle našych acenak, jon pavinien byŭ skłaści 98% (minus dva pracenty da minułaha hoda) — hety prahnoz nie spraŭdzicca z-za taho, što niama kančatkovaha rašeńnia ab kupli nafty ŭ Rasijskaj Fiederacyi», — zajaviŭ ministr.
Pavodle jaho słoŭ, realnaje źnižeńnie VUP u biahučym hodzie moža skłaści ad 2,6 da 3%.
«Pakolki nafta i naftapradukty majuć značnuju vahu ŭ VUP, u abjomie mytnych pošlin — voś taki prahnoz», — dadaŭ Zinoŭski.
Ministr zajaviŭ, što hety prahnoz budujecca na čysta prahmatyčnych raźlikach, pakolki Ministerstva ekanomiki «nie adnosicca da viedamstva «adhadaj».
Pry hetym čynoŭnik vykazaŭ upeŭnienaść u tym, što makraekanamičnaja stabilizacyja ŭ krainie zachavajecca i pa vynikach hoda ŭdasca strymać inflacyju ŭ ramkach zapłanavanych 12%. Zinoŭski taksama padkreśliŭ, što jaho radujuć pośpiechi ŭ śfiery mašynabudavańnia, dzie na siońnia zafiksavany samy nizki za apošnija hady ŭzrovień składskich zapasaŭ, a taksama toje, što «niadrenna raźvivajecca sielskaja haspadarka».
