30 listapada Homielski abłasny sud abviaściŭ pryhavor u dačynieńni da 37-hadovaha žychara Homielskaha rajona, hramadzianina Rasijskaj Fiederacyi. Jon abvinavačvaŭsia ŭ zabojstvie 40-hadovaha žychara Homiela, jaki pracavaŭ taksistam. Za ŭčynieńnie zabojstva, a taksama za niezakonnyja dziejańni z ahniastrelnaj zbrojaj i razboj rasijanin pryhavorany da 22 hadoŭ pazbaŭleńnia voli va ŭmovach ŭzmocnienaha režymu z kanfiskacyjaj majomaści.
Taksama na karyść paciarpiełaj (žonki zahinułaha) budzie spahnanaja materyjalnaja škoda ŭ 1 tys. rubloŭ i maralnaja ŭ 50 tys. rubloŭ
Žonka zabitaha taksista Alena zajaviła žurnalistam paśla vyniasieńnia prysudu, što chacieła b bolš surovaha pakarańnia dla zabojcy svajho muža. Jana zhodnaja z pazicyjaj abvinavačańnia, jakoje prasiła dla abvinavačanaha 25 hadoŭ strohaha režymu. U svaju čarhu maci zabitaha zajaviła, što jany chacieli b śmiarotnaha pakarańnia dla zabojcy, ale nie patrabavali hetaha na sudzie.
Prysud nie nabyŭ zakonnaj mocy.
Złačynstva było ŭčynienaje 16 sakavika 2016 hoda. 40-hadovy žychar Homiela, supracoŭnik «Taksi 155 Alfa», pajechaŭ na pracu na mašynie «Ford-Hełaksi». Praz hadzinu jon pa telefonie paviedamiŭ žoncy, što jedzie dadomu, ale źnik.
Jaho šukali milicyja, kalehi, vałanciory. Dniom 18 sakavika cieła źnikłaha z prykmietami hvałtoŭnaj śmierci było znojdzienaje ŭ lesie kala vioski Sasnoŭka.
Nieŭzabavie byŭ ustanoŭleny i padazravany — žychar vioski 37-hadovy hramadzianin Rasii. Taksista jon zastreliŭ z revalviera. Zbroju abvinavačvany, pavodle jaho słoŭ, kupiŭ raniej na rynku ŭ Padmaskoŭi. Padčas śledstva abvinavačvany, choć i nie adrazu, pryznaŭsia ŭ złačynstvie.
Abvinavačany ŭ sudzie śćviardžaŭ, što sapraŭdy zabiŭ taksista i zavałodaŭ jaho aŭtamabilem, hrašyma, mabilnym telefonam, płanšetam, naboram instrumientaŭ, navihataram i hetak dalej (usiaho na 24 tysiačy denaminavanych rubloŭ), ale zrabiŭ heta spantanna. «To bok ja chacieŭ učynić razboj, zavałodać hrašyma taksista, ale nie chacieŭ jaho zabivać, a tolki papałochać pistaletam», — tłumačyŭ na sudzie rasijanin. Patrebnyja byli hrošy, «na budaŭničyja materyjały, polikarbanat dla ciaplicy», udakładniaŭ abvinavačany.
Uradženiec Nabiarežnych Čałnoŭ (Tatarstan), jon u 2006 hodzie byŭ sudzimy za kradziež, atrymaŭ umoŭny termin. Raniej, z 1999 hoda, słužyŭ u armii na Paŭnočnym Kaŭkazie pa kantrakcie. Na pytańnie, ci braŭ udzieł u bajavych dziejańniach, adkazvać admoviŭsia. Rasijanin paznajomiŭsia praź internet ź biełaruskaj, žycharkaj Sasnoŭki Homielskaha rajona, i pierajechaŭ da jaje, para zarehistravała šlub. Žonka pracavała lekaram. Dzieci naradzilisia ŭ 2014 i 2015 hadach.
