Pavodle słužbaŭ pa baraćbie z narkotykami, Čavesava Venesueła stałasia hałoŭnym šlacham pastaŭki dla bolšaj častki kakainu, jaki pradajecca na vulicach Vialikaj Brytanii.
Miarkujecca, što ciaham apošniaha hodu ahułam kala 250 tonaŭ hetaha narkotyku prajšli praź Venesuełu, što ŭ 5 razoŭ bolš, čym u 2004 hodzie. Vialikaja kolkaść kakainu ŭ vyniku apynułasia ŭ Vialikaj Brytanii.
Pavodle acenki słužby pa baraćbie z narkotykami bolš za 50 adsotkaŭ usiaho kakainu, spažytaha ŭ Złučanym Karaleŭstvie trapiła ŭ krainu akurat praź Venesuełu, jakoj kiruje revalucyjny režym Uha Čavesa.
Ličycca, što vyšejšaje kiraŭnictva ŭ Čavesavaj słužbie biaśpieki atrymlivaje prybytki ad takoha handlu i tamu aktyŭna spryjaje kantrabandystam, naprykład, dazvalajučy im vykarystoŭvać vajskovyja aeradromy.
Raniej bolšaść narkotykaŭ nielehalna transpartavałasia paŭnočnakarybskim šlacham, kab dalej trapić u Eŭropu ci Ameryku. Adnak, siońnia kakain vierahodniej za ŭsio idzie praz uschodniuju kalumbijskuju miažu ŭ Venesuełu.
Adsiul narkotyki, pryznačanyja dla Eŭropy, pieravoziacca praz Atlantyku ŭ Zachodniuju Afryku, u małyja krainy.
U 1998 hodzie – za hod da taho, jak Čaves atrymaŭ uładu – venesuelskija słužby biaśpieki ździejśnili 11581 aryšt, tak ci jnakš źviazany z narkotykami. U 2005 kolkaść padobnych aryštaŭ skłała adno 1082.
U hetym hodzie sytuacyja krychu palepšała: ciaham studzienia-sakavika zafiksavanyja 1979 aryšty. Adnak, ahulnaja ich kolkaść pa-raniejšamu našmat mienšaja za tuju, što była da prychodu Čavesa da ŭłady.
Pieratvareńnie Venesueły ŭ prytułak dla narkakurjeraŭ maje šerah pryčynaŭ. Uha Čaves, jaki nazyvaje Džordža Buša čortam, aficyjna prypyniŭ usialakuju supracu z amerykanskimi słužbami pa baraćbie z narkotykami.
Bolš za toje, Čaves maje daŭnija dobryja dačynieńni z marksisckimi paŭstancami z Revalucyjnych uzbrojenych siłaŭ Kalumbii (FARC). Tyja insurhienty zarablajuć na žyćcio za košt transpartavańnia narkotykaŭ.
U 2006 h. samalot DC-9 z 5,5 tonami kakainu na borcie byŭ aryštavany paśla pryziamleńnia ŭ Meksycy. Hety samalot lacieŭ z Aeraportu im. Symona Balivara venesuelskaj stalicy Karakasu. Takaja vialikaja kolkaść narkotykaŭ mahła apynucca na borcie tolki ŭ vyniku zmovy z słužbami achovy aeraportu.
Vialikaja častka kalumbijskaha kakainu traplaje ŭ Venesuełu na małych samalotach. Pradstaŭniki słužbaŭ pa baraćbie z narkotykami, jakija vysočvajuć hetyja nielehalnyja loty, kažuć, što jany pryziamlajucca na vajskovych aeradromach unutry Venesueły.
Tut kakain pierahružajuć u samaloty vialikaj dalnaści, zvyčajna typu Gulfstream, Boeing 727 ci DC-9, u jakich narkotyki pieravoziacca ŭ Zachodniuju Afryku.
Amerykanskija słužby adsočvali šmatlikija pieravozki partyjaŭ kakainu ź venesuelskaha bierahu ŭ Trynidad i Tabaha. Pavodle apošniaj amerykanskaj Stratehičnaj spravazdačy ab kantroli za narkotykami (Narcotics Control Strategy Report) venesuelskija vajskoŭcy zazvyčaj spryjajuć i navat achoŭvajuć hetyja pieravozki.
Jon adznačaje taksama fakt prysutnaści na venesuelskaj terytoryi šyrokaviadomych narkabaronaŭ.
Vilber Vareła, hałoŭnaja fihura kalumbijskaha kartelu Norte del Valle, žyŭ u Venesuele. Jon byŭ zabity ŭ studzieni mahčyma kimści z kankurentaŭ. Paśla prypynieńnia dziejnaści Medeljinskaha i Kalijskaha kartelaŭ Norte del Valle była viadučaj siećciu ŭ handli narkotykami.
Niama dokazaŭ, što Ŭha Čaves asabista źviazany z handlem narkotykami ci atrymańniem prybytku ad ich kantrabandy. Adnak, słužby pa baraćbie z narkotykami ličać, što Čaves musić viedać ab zmovie pamiž kantrabandystami i venesuelskimi siłami biaśpieki.
Sam Čaves nazvaŭ narkotyki złom. U červieni jon taksama zaklikaŭ FARC spynić paŭstańnie.
