«Atłant Telekam» zachavaje brend i jurydyčnuju samastojnaść paśla prodažu

Mižnarodny chołdynh Telekom Austria Group, jaki vałodaje velcom, zaviaršyŭ ździełku pa kupli 100% dolaŭ statutnaha fondu «Atłant Telekama» i daččynaj «Telesietki» u inviestkampanii «Zubr Kapitał» i Jeŭrapiejskaha banka rekanstrukcyi i raźvićcia (JEBRR). Fiksavanaja sietka apieratara budzie aktyŭna raźvivacca, a dla abanientaŭ «usio źmienicca tolki da lepšaha», zajavili ŭ pres-słužbie velcom.

«Rašeńniaŭ pa źmienie brenda «Atłant Telekam» nie było, jurydyčnaja samastojnaść kampanii zachavajecca, a ŭsie biahučyja abaviazacielstvy pierad abanientami buduć vykonvacca ŭ poŭnym abjomie», — adznačyŭ namieśnik hienieralnaha dyrektara velcom pa fiksavanaj suviazi i intehracyi, a taksama dyrektar «Atłant Telekama» Anton Bładzik. Pavodle jaho słoŭ, «Atłant Telekam» razam z velcom praciahnie budaŭnictva Ethernet-sietki ŭ Minsku i abłasnych centrach. Ciapier śpiecyjalisty abiedźviuch kampanij razam vyvučajuć roznyja scenaryi raźvićcia infrastruktury i padklučeńnia novych karystalnikaŭ.

Jakaść pasłuhi fiksavanaha internetu i servisu dla klijentaŭ budzie pavyšana za košt tranśfieru technałohij ad velcom i abjadnańnia resursaŭ. «Źmieny buduć adbyvacca tolki ŭ lepšy bok. Kampietencyi, jakimi vałodaje velcom, buduć nakiravany na toje, kab stvaryć maksimalnyja vyhody dla karystalnikaŭ brenda «Atłant Telekam» va ŭsich haradach jaho prysutnaści», — adznačyŭ top-mieniedžar velcom.

Taryfnaja palityka ŭ śfiery fiksavanaha internetu pakul zastaniecca bieź źmien. Toje ž samaje tyčycca IP-telebačańnia i inšych servisaŭ, jakija kampanija pradstaŭlaje abanientam. Kolkaść telekanałaŭ płanujuć pavialičyć. «U budučyni servis IPTV pavinien atrymać bolš telekanałaŭ i kantentu. Akramia taho, jon stanie bolš mabilnym — płanujecca, što hladzieć telebačańnie možna budzie z roznych pryład», — rastłumačyli ŭ kampanii.

Vopyt brenda «Atłant Telekam» dapamoža apierataru velcom z raźvićciom fiksavanaha internetu dla fizičnych i jurydyčnych asob. «Taja ekśpiertyza, jakaja za hady pracy nakoplena pravajdaram, znojdzie prymianieńnie pry dalejšym budaŭnictvie fiksavanaj sietki i padklučeńni novych abanientaŭ», — adznačyŭ Anton Bładzik.

«Atłant Telekam» ciapier naličvaje 126 tys. abanientaŭ fiksavanaj suviazi i 49 tys. — kabielnaha telebačańnia. Na hety momant heta najbujniejšy pryvatny pravajdar u Biełarusi, jaki raźvivaje fiksavany šyrokapałosny dostup u internet, IPTV i kabielnaje telebačańnie. Kampanija velcom, u svaju čarhu, maje bolš za tysiaču klijentaŭ — jurydyčnych asob i kala 170 biźnies-centraŭ, padklučanych da fiksavanaha internetu apieratara.

U 2011 hodzie JEBRR praz kampaniju «Zubr Kapitał» nabyŭ 35-pracentnuju dolu «Atłant Telekama». Suma ździełki nie nazyvałasia. Płanavałasia, što inviestycyi JEBRR plus sumiesnaje rašeńnie akcyjanieraŭ ab reinviestavańni prybytku ŭ raźvićcio kampanii dazvolać realizavać prajekt koštam 15—20 młn dołaraŭ u najbližejšyja niekalki hadoŭ.

Apieratar velcom pačaŭ ažyćciaŭlać u Biełarusi kamiercyjnuju dziejnaść pa pradastaŭleńni pasłuh i tavaraŭ mabilnaj suviazi 16 krasavika 1999 hoda. Ź listapada 2007 hoda velcom uvachodzić u skład chołdynhu Telekom Austria Group, adnaho ź viadučych telekamunikacyjnych pravajdaraŭ u Centralnaj i Uschodniaj Jeŭropie. Kolkaść abanientaŭ velcom pieravyšaje piać miljonaŭ.

• 0
• 0
• 0
• 0
• 0
• 0
• 0
• 0