Minsk vystupaje za sustreču lidaraŭ Rasii, ZŠA, Jeŭrasajuza i Kitaja dla abmierkavańnia pryčyn kryzisu ŭ mižnarodnych adnosinach. Pra heta zajaviŭ ministr zamiežnych spraŭ Biełarusi Uładzimir Makiej 8 śniežnia na pasiadžeńni Savieta kiraŭnikoŭ MZS krain ABSIE ŭ Hamburhu, paviedamlaje pres-słužba biełaruskaha MZS.
«Bolš za 40 hadoŭ tamu dla razradki ŭ adnosinach pamiž Zachadam i Uschodam spatrebiŭsia chielsinkski praces, padčas jakoha byli vypracavanyja pryncypy mirnaha ŭzajemadziejańnia dziaržaŭ va ŭmovach dvuchpalarnaha śvietu, — skazaŭ Makiej. — Siońniašniaja situacyja, na žal, vielmi nahadvaje «dachielsinkski» pieryjad. Raście adčužeńnie pamiž Zachadam i Rasijaj. Usio vyraźniej stanovicca pierśpiektyva novaj «chałodnaj vajny».
Pavodle słoŭ Makieja, «naśpieła nieabchodnaść sustrečy lidaraŭ Rasii, ZŠA, ES, Kitaja dla adkrytaha abmienu dumkami ab pryčynach kryzisu ŭ mižnarodnych adnosinach». «Važna pakłaści pačatak asensavańniu novych praviłaŭ šmatpalarnaści, jakaja farmirujecca, pry biezumoŭnaj pavazie intaresaŭ adzin adnaho. Pry nieabchodnaści — padklučyć da hetaha pracesu mižnarodnuju ekśpiertnuju supolnaść. Biełaruś hatova arhanizavać adpaviednyja sustrečy ŭ Minsku», — dadaŭ ministr.
Jon taksama zaznačyŭ, što na fonie kryzisu davieru i ŭzmacnieńnia kanfrantacyi jašče bolšuju pahrozu ŭjaŭlajuć rehijanalnyja kanflikty. Ich ŭrehulavańnie i praduchileńnie Makiej nazvaŭ klučavoj zadačaj ABSIE. «Naša arhanizacyja (ABSIE) dakazała svaju zapatrabavanaść, prymajučy ŭdzieł va ŭrehulavańni kanfliktu va Ukrainie. Biełaruś całkam padtrymlivaje dziejnaść trochbakovaj kantaktnaj hrupy i Śpiecyjalnaj manitorynhavaj misii ABSIE va Ukrainie. Hatovyja i dalej rabić usio, što ŭ našych siłach, kab mir i spakoj zapanavali na ziamli bratniaj Ukrainy», — padkreśliŭ Makiej.
