Trecim zatrymanym adeptam «ruskaha śvietu» staŭ karespandent «Rehnuma» ŭ Biełarusi Siarhiej Šyptenka
Na sajcie impierskaha partała «Rehnum» źjaviłasia paviedamleńnie ab zatrymańni ŭ Biełarusi jašče adnaho aŭtara, Siarhieja Šyptenki. Jon pradstaŭleny jak «karespandent Rehnuma».
Kamientujučy zatrymańnie svaich paplečnikaŭ Paŭłaŭca i Alimkina, Šyptenka «papiaredžvaŭ» biełarusaŭ: «Ssumavalisia pa vietlivych ludziach».
«Śledčym kamitetam Respubliki Biełaruś u ramkach rasśledavańnia kryminalnaj spravy pa č. 1 art. 130 KK RB zatrymany Siarhiej Šyptenka, hramadzianin RB, jaki pastajanna pražyvaje ŭ Minsku.
Jon padazrajecca ŭ ździajśnieńni naŭmysnych dziejańniaŭ, nakiravanych na ŭzbudžeńnie ŭ roznych hrup nasielnictva Rasijskaj Fiederacyi i Respubliki Biełaruś nacyjanalnaj i inšaj sacyjalnaj varožaści, a taksama varožaści pa prykmietach nacyjanalnaj, moŭnaj i inšaj sacyjalnaj prynaležnaści, jakija vyjavilisia ŭ padrychtoŭcy i raźmiaščeńni ŭ internecie artykułaŭ pad psieŭdanimam Artur Hryhorjeŭ.
U ciapierašni čas z udziełam padazravanaha pravodziacca śledčyja dziejańni», — paviedamlajecca na sajcie SK.
* * *
Šyptenka, jak i Alimkin, kolišni vypusknik Akademii kiravańnia pry prezidencie, maje svajakoŭ va Ukrainie.
U adroźnieńnie ad zatrymanych adnadumcaŭ, Šyptenka padpisvaŭsia na «Rehnumie» ułasnym imiem.
Čyrvonaj stužkaj praź jaho publikacyi prachodziła ideja ab «sieparatnym» charaktary biełaruskaj dziaržaŭnaści i patrebie «uźjadnańnia» z Rasijaj.
Sioletni «Dzień vyšyvanki» u Minsku Šyptenka paraŭnaŭ z prymusovymi mierapryjemstvami časoŭ niamieckaj akupacyi.
«Dalej padać niama kudy. Albo my adnovim krainu, uźjadnajemsia i adrodzimsia, albo budziem praklatyja nazaŭždy, zahiniem u pakutach i staniem hnojem», — tak jon apisvaŭ pierśpiektyvu biełaruska-rasijskich adnosinaŭ u svaich materyjałach.
«Jamu pa načach śnilisia ludzi, jakich jon pasadziŭ». Stali viadomyja novyja detali apošnich dzion žyćcia syna Jarmošynaj15
Kamientary