Suviaź 4G stanie dastupnaja va ŭsich abłasnych centrach Biełarusi 23 śniežnia

Suviaź 4G stanie dastupnaja va ŭsich abłasnych centrach Biełarusi 23 śniežnia, paviedamiŭ na pres-kanfierencyi 14 śniežnia ŭ Minsku hienieralny dyrektar infrastrukturnaha apieratara beCloud Siarhiej Pabłahujeŭ.

Pavodle jaho słoŭ, pasłuhami 4G zmohuć skarystacca abanienty mabilnaha apieratara «MTS» Homiela, Bresta, Viciebska, Mahilova i Hrodna. Pašyrycca pakryćcio LTE-sietki ŭ Minsku, jana źjavicca ŭ pryharadach stalicy — Ždanovičach, Ratamcy, Kałodziščach, Sienicy, Stajkach, Tarasavie i inšych pryharadach.

Jak abiacaje beCloud, usiaho praź miesiac, u studzieni 2017-ha, sietka LTE-Advanced (4G) zapracuje taksama bolš čym u tryccaci rehijonach — Barysavie, Babrujsku, Maładziečnie, Baranavičach, Salihorsku, Pinsku, Kobrynie, Pružanach, Lidzie, Mazyry, Dobrušy, Škłovie, Oršy, Połacku, Navapołacku, Brasłavie, Lepieli, Vierchniadźvinsku i inšych haradach. Staličnyja i rehijanalnyja bazavyja stancyi LTE buduć pracavać u dyjapazonie 1.800 MHc (pry dalejšym raźvićci sietki budzie vykarystoŭvacca dyjapazon 2.600 MHc).

Sietku LTE Advanced u Biełarusi zapuścili ŭ kamiercyjnuju ekspłuatacyju 17 śniežnia 2015 hoda. Jaje budaŭnictvam zajmajecca pieršy infrastrukturny apieratar beCloud dla nastupnaha padavańnia jaje ŭ karystańnie ŭsim zacikaŭlenym apierataram. Pakul technałohija 4G była dastupnaja tolki ŭ Minsku, i na hety momant zacikavilisia padavańniem pasłuhi pa hetaj technałohii apieratary «MTS» i life:).

Na pres-kanfierencyi było abvieščana, što na hety momant u «MTS» kala 170 tysiač abanientaŭ 4G. Apieratar life:) pačaŭ kamiercyjnuju ekspłuatacyju pasłuh na bazie LTE (4G) tolki ŭ vieraśni 2016 hoda. Źviestki pra kolkaść jaho abanientaŭ 4G pradstaŭniki beCloud na pres-kanfierencyi nazvać nie zmahli.

U svaju čarhu jašče adzin najbujniejšy biełaruski mabilny apieratar velcom nieadnarazova zajaŭlaŭ, što ŭ vypadku atrymańnia dazvołu ad dziaržavy i pry najaŭnaści licenzii hatovy ŭ samyja karotkija terminy zapuścić 4G samastojna.

Miž tym, jak było abvieščana pradstaŭnikami beCloud, patencyjna ŭ niedalokaj budučyni 4G budzie dastupny bolš jak piaci z pałovaj miljonam biełarusaŭ, abo 75% haradskoha nasielnictva krainy. U pryvatnaści, da kanca 2017 hoda beCloud płanuje zabiaśpiečyć LTE asnoŭnyja bujnanasielenyja harady. U pierśpiektyvie 4G moža źjavicca va ŭsich rajonnych centrach.

Jak paviedamili pradstaŭniki beCloud, značnaja cikavaść da technałohii paćviardžajecca štomiesiac usio bolšaj aktyŭnaściu karystalnikaŭ. Z momantu zapusku LTE-sietki siaredniasutačny trafik, hienieravany karystalnikami, vyras bolš čym u šeść razoŭ — da 28 terabajt. Sumarny trafik za hod pracy sietki ŭ stalicy pieravysiŭ 4,5 pietabajta, ci 4 tysiačy 608 terabajt.

Long Term Evolution (LTE, 4G) — pierśpiektyŭnaje (čaćviortaje) pakaleńnie mabilnaj suviazi, jakoje charaktaryzujecca vysokaj chutkaściu pieradačy źviestak i pavyšanaj jakaściu hałasavoj suviazi. Sietka čaćviortaha pakaleńnia dazvalaje zabiaśpiečyć chutkaść pieradačy danych u 5—15 razoŭ vyšej, čym 3G.

STAA «Biełaruskija vobłačnyja technałohii» (beCloud) — infrastrukturny apieratar, stvorany na padstavie ŭkaza prezidenta 19 śniežnia 2012 hoda. Dziejnaść beCloud zaklučajecca ŭ prajektavańni, budaŭnictvie, asnaščeńni i ekspłuatacyi apornaj sietki pieradačy danych dla Adzinaj respublikanskaj sietki pieradačy danych; respublikanskaha centra apracoŭki danych; sietki čaćviortaha pakaleńnia LTE; učastka tranzitnaj mahistrali sietki elektrasuviazi pa terytoryi Biełarusi.

beCloud budzie absłuhoŭvać sietku, raźmiarkoŭvajučy pamiž apieratarami na roŭnych umovach dostup da infrastruktury. Pry hetym jon nie budzie pracavać z abanientami naŭprost: pasłuhi i taryfy na ich vyznačać sami apieratary. Skarystacca pasłuhami beCloud zmohuć nie tolki mabilnyja apieratary, ale i kampanii, jakija žadajuć stać virtualnymi apieratarami, a taksama internet-pravajdary biez hałasavoj suviazi.

• 0
• 0
• 0
• 0
• 0
• 0
• 0
• 0