Sud Maładziečanskaha rajona prysudziŭ byłoha namieśnika staršyni Vałožynskaha rajvykankama Iosifa Laškieviča da vaśmi hadoŭ pazbaŭleńnia voli za karupcyjnyja złačynstvy.
Čynoŭnik byŭ zatrymany hod tamu. Jak paviedamlali raniej u MUS, jon dapamoh asvoić kala 2 młrd rubloŭ (niedenaminavanych), jakija ź biudžetu byli vydzielenyja na rekanstrukcyju i budaŭnictva sacyjalnych abjektaŭ. Hrošy pieraličyli pryvatnamu pradpryjemstvu, za heta Laškievič atrymaŭ 40 kvadratnych mietraŭ parkietu, jaki pravaachoŭniki acanili ŭ 10 młn rubloŭ. U vyniku niezakonnaj ździełki sarvaŭsia termin zdačy šmatkvaternaha doma. Padradčyk akazaŭsia niadobrasumlennym, akty ab vykananych rabotach byli fiktyŭnyja.
Jak paviedamlaje Minski abłasny sud, Iosif Laškievič pryznany vinavatym u pieravyšeńni ŭłady i słužbovych paŭnamoctvaŭ (č. 3 art. 426 KK), a taksama ŭ atrymańni chabaru (č. 3 art. 430 KK). U vyniku sud pryznačyŭ jamu pakarańnie ŭ vyhladzie vaśmi hadoŭ pazbaŭleńnia voli ŭ kałonii ŭzmocnienaha režymu z kanfiskacyjaj majomaści.
Asablivaść hetaj kryminalnaj spravy ŭ tym, što sudovaje śledstva było adnoŭlena paśla taho, jak sudździa pajšła ŭ daradčy pakoj dla vyniasieńnia pryhavoru. Sprava razhladałasia pad staršynstvam sudździ Iniesy Južyk.
Prysud nie nabyŭ moc, abvinavačvany maje namier abskardzić jaho ŭ Minskim abłasnym sudzie.
