Sioleta Ambasovišča — u žyvym etery Netradio.by

Cikavaść da sioletniaha «Ambasovišča», što pravodzić amerykanskaja ambasada ŭ Biełarusi — nadzvyčajnaja.

Arhanizatary festu vyrašyli pašyryć konkurs i dać mahčymaść vystupić hurtam z usich rehijonaŭ Biełarusi. Usiaho na scenu, admysłova zbudavanuju dla festu na terytoryi rezydencyi amerykanskaha ambasadara, vyjduć bolš za 10 hurtoŭ. U hości čakajuć bolš za 300 pradstaŭnikoŭ biełaruskaj muzyčnaj industryi, žurnalistaŭ i dyplamataŭ. Žyvuju tranślacyju z hetaha mierapryjemstva buduć vieści adrazu dźvie radyjostancyja — radyjo «Racyja» i NETradio. Padrabiaznaści pra sioletniaje «Ambasovišča» TH raspaviała ataše pa pytańniach infarmacyi, adukacyi i kultury ambasady ZŠA Kerałajn Sevidž.

«Ambasovišča‑2008» stałasia ŭžo dobraj tradycyjaj. Fest pravodzicca raz na hod na terytoryi rezydencyi amerykanskaha ambasadara, što znachodzicca ŭ Raŭbičach. Sioleta jon adbudziecca 11 lipienia. Haspadarom jaho vystupić časovy pavierany Džonatan Mur. Na hetaje muzyčnaje śviata zaprošana la 300 haściej. Kerałajn Sevidž kaža, što siarod ich — viadomyja biełaruskija muzyki, prafesijanały ŭ sfery muzyčnaj industryi, pradstaŭniki hramadzkaj supolnaści i dyplamaty. «My ličym, što «Ambasovišča« — heta śviata biełaruskaj muzyki i svabody mastackaha samavyjaŭleńnia i vielmi chočam, kab u im uziali ŭdzieł jak maha bolej cikavych i talenavitych ludziej», — kaža ataše.

Sioleta na «Ambasoviščy» było vyrašana zładzić muzyčny konkurs siarod pradstaŭnikoŭ usich biełaruskich rehijonaŭ. Ciaham niekalkich miesiacaŭ arhanizatary akcyi adbirali muzyčnyja hurty dla ŭdziełu ŭ feście. U vyniku spynilisia na nastupnych vykanaŭcach:

Indra (Połacak)
Zatoczka (Mahileŭ)
Džambibum (Miensk)
Kalmary (Biaroza)
Tlusta Lusta (Horadnia)
Hlintviejn (Homiel)

Pieramožcu siarod hetych hurtoŭ buduć adbirać hości festyvalu praz hałasavańnie. Druhaja ž častka «Ambasovišča» — vystup užo viadomych biełaruskich hurtoŭ. Na scenu vyjduć «Krama», «Krambambula», Garadzkija i Mauzer. Ale i heta jašče nia ŭsio. Sa słovaŭ Kerałajn Sevidž, udzieł u feście voźmuć i amerykanskija muzyki. «My daŭno chacieli zaprasić na hetuju akcyju adzin z našych hurtoŭ i sioleta ŭ nas heta atrymałasia. Admysłova dla vystupu na «Ambasoviščy« z ZŠA pryjedzie kamanda Fox Trio. Spadziajemsia, što ich muzyka pryjdziecca daspadoby biełaruskim słuchačam».

Upieršyniu za čatyrochhadovuju historyju festu kožny achvočy zmoža virtualna paprasutničać na im. Sioleta žyvuju tranślacyju z «Ambasovišča» buduć vieści adrazu dźvie radyjostancyi.

***

«Ambasovišča‑2008». Rezydencyja ambasadara ZŠA (Raŭbičy). 11 lipienia. Pačatak u 16:00

Žyvaja tranślacyja na radyjo «Racyja» (FM 98,1, Biełastok i praz racyja.com). Padrabiaźniej

Žyvaja tranślacyja na NETradio

SB, Tuzin hitoŭ

• 0
• 0
• 0
• 0
• 0
• 0
• 0
• 0