Ministr zamiežnych spraŭ Polščy: «Biełsat» u ciapierašnim vyhladzie źniknie, hrošy pojduć siryjskim biežancam
Ministr zamiežnych spraŭ Polščy Vitold Vaščykoŭski raskazaŭ u intervju sajtu Wpolityce.pl pra dalejšyja pierśpiektyvy telekanała «Biełsat».
Vaščykoŭski padkreśliŭ, što pytańnie nie tolki ŭ situacyi z «Biełsatam», paŭstała pytańnie reformy TVP Polonia i efiektyŭnaści zamiežnaha viaščańnia. Akramia novaha teleprajektu, nakiravanaha na Biełaruś, palaki taksama płanujuć zapuścić na anhlijskaj movie kanał, jaki budzie aśviatlać padziei ŭ Centralna-Uschodniaj Jeŭropie.
Vaščykoŭski patłumačyŭ, što biełaruskija ŭłady hatovyja dadać telekanał TVP Polonia ŭ kabielnyja sietki: «Biełsat tranślujecca na praciahu 10 hadoŭ, i jaho ŭpłyŭ na realnaść ścipły. Alternatyva ŭ tym, kab dazvolić pieradavać TVP Polonia dla ŭsioj terytoryi Biełarusi».
Novy prajekt budzie nakiravany na palakaŭ, jakija žyvuć u Biełarusi, i tych, «chto chacieŭ by vałodać polskaj». Ź intervju vynikaje, što novy telekanał nie budzie nastolki «apazicyjnym», ale zatoje daść biełarusam mahčymaść pahladzieć, jak žyvie sučasnaja Polšča. «Malunak varty tysiačy słovaŭ, — patłumačyŭ Vaščykoŭski. — I biełarusy buduć hladzieć na Polšču tak, jak palaki pry kamuniźmie hladzieli na Zachad».
Kančatkovaje rašeńnie ab stvareńni novaj redakcyi budzie pryniata ŭ bližejšyja dni. Ale ž biełaruskuju redakcyju zvalniać pakul nichto nie źbirajecca — Ahnieška Ramašeŭskaja ŭžo atrymała prapanovu vysokaj pasady ŭ TVP Polonia, žurnalisty «Biełsatu» zmohuć praciahnuć pracu na internet-partale albo rabić siužety dla novaha kanała.
Vaščykoŭski padkreśliŭ, što Polšča musić aščadžać hrošy, kab pavialičvać dapamohu siryjskim biežancam, a taksama krainam Afryki i Azii.
Ciapier čytajuć
Jak razhuł pryrody viarnuŭ cieły Barbary Radzivił i vialikaha kniazia Alaksandra i čamu tajamnicu źniknieńnia ichnich rehalij zmahli raskryć tolki ciapier77
Kamientary