MAZ raspracavaŭ «razumny» hruzavik, jaki zmoža ŭmiešvacca ŭ pracu kiroŭcy
Na Minskim aŭtazavodzie zaviaršajucca vyprabavańni «razumnaha» hruzavika, jaki zmoža samastojna reahavać na źmienu situacyi na darozie i pry nieabchodnaści ŭmiešvacca ŭ pracu kiroŭcy: pavialičvać abo źnižać chutkaść, spyniać aŭtamabil i papiaredžvać pra niebiaśpieku.
Pavodle infarmacyi pradpryjemstva, hruzavik abstalavany pieradavymi elektronnymi sistemami padvyšanaj aktyŭnaj biaśpieki, jakija zmohuć praduchilać avaryi. Kali aŭtamabil raspaznaje napieradzie pieraškodu, na jakuju nie reahuje kiroŭca, hruzavik sam ekstrana zatarmozić.
Aŭtamabil abstalavany sistemaj kantrolu ruchu pa pałasie. Varta kiroŭcu źjechać z pałasy ruchu, nie ŭklučyŭšy pakazalnik pavarotu, jak spracujuć zumiery i vibramatory. U pierśpiektyvie sistema dazvolić viarnuć aŭtamabil u raniejšuju pałasu ruchu.
Akramia taho, «razumny» hruzavik atrymaŭ adaptyŭny kruiz-kantrol, jaki dazvalaje jechać z chutkaściu aŭtamabila, što jedzie napieradzie, i padtrymlivać ad jaho adlehłaść.
«Sistema budzie fiksavać lubyja źmieny ŭ chutkaści aŭtamabila, jaki jedzie napieradzie. Kali jon zatarmozić — źnizić chutkaść i «razumny» hruzavik, paskorycca — hetak ža pastupić i naša mašyna. Havorka idzie nie prosta pra toje, kab padtrymlivać peŭnuju chutkaść, a kab ekstrana reahavać na źmianieńnie darožnaj abstanoŭki i zabiaśpiečvać maksimalny ŭzrovień biaśpieki i kamfortu dla kiroŭcy i tym samym pavysić efiektyŭnaść hruzapieravozak», — adznačyŭ namieśnik hałoŭnaha kanstruktara pradpryjemstva Mikałaj Łakotka.
Ekspłuatacyjnyja vyprabavańni elektronnych sistem hruzavika nabližajucca da zaviaršeńnia. U 2017 hodzie jany źjaviacca na sučasnych hruzavikach ekałahičnaha kłasa Jeŭra-6. «Razumny» hruzavik pryznačany ŭ pieršuju čarhu dla jeŭrapiejskich mahistralaŭ.
«Šmat što zaležyć ad asablivaściaŭ isnujučaj darožnaj raźmietki. Naprykład, rasijskija darohi da takich intelektualnych sistem pakul jašče nie zusim hatovy», — patłumačyŭ Łakotka.
Ciapier čytajuć
Historyja ŭ EHU — heta histfak vašaj mary. Jeŭrapiejski dypłom z navučańniem na biełaruskaj movie pry intensiŭnym vyvučeńni anhlijskaj. I poŭnaja svaboda11
Kamientary